Urgel (en llatín: Dioecesis Urgellensis; en catalán: Bisbat d'Urgell) ye una diócesis de la Ilesia católica, sufragánea de l'archidiócesis de Tarragona.
Territoriu
Catedral d'Urgel.
La diócesis entiende parte de les provincies de Lleida y de Girona y la totalidá del Principáu d'Andorra.
La sede episcopal ta en La Seu d'Urgell, nome que provién de ser la sede del obispáu (en llatín: Sedes Urgelli).
La socesión episcopal nun s'atayó mientres la invasión árabe (714).
L'obispu Félix (783-792) foi acusáu d'adopcionismo polos teólogos carolinxos y foi depuestu y exiliáu a Lyon.
En 1010 na llocalidá d'Ivorra asocedió un famosu milagru: mientres el párrocu Bernat Oliver, que duldaba sobre la transustanciación, taba celebrando la consagración, el vinu se transmutó en sangre vivo. L'obispu san Ermengol informó darréu del milagru al papa Sergio IV. Recoyéronse reliquies del milagru nun preciosu relicariu en 1426 y en 1663 construyóse un santuariu.
A partir del sieglu X, hasta'l sieglu XIII los obispos d'Urgel atroparon un importante patrimoniu de señoríu, portándose dafechu como señores feudales de la dómina. Dende'l 8 de setiembre de 1278 los obispos d'Urgel son tamién Copríncipes d'Andorra xunto colos socesivos condes de Foix primeru y, por socesión, colos reis de Navarra, asocedíos polos reis de Francia y, yá en dómines republicanes, los presidentes de la República francesa (en cuantes que xefes del estáu).
