PROFILPELAJAR.COM

La batalla conocida como Desastre d'Annual foi una batalla qu'enfrentó, el 22 de xunetu de 1921, n'Annual (Marruecos español), al Exércitu d'África español y a combatientes bereberes de la rexón del Rif, demientres la guerra del Rif. L'exércitu español sufrió una gran derrota que provocó una gran crisis política y obligó a redefinir la política colonial española nel Rif.

Descripción

A primeros de 1921 l'exércitu español entamó una ofensiva nel Marruecos nororiental, partiendo pa ello de les fasteres costeres que yá controlaben. L'avance fízose ensin establecer llinies de comunicación adecuaes, y ensin pacificar por completu les zones que diben ocupándose, lo que dexaba grupos armaos a retaguardia de les tropes qu'avanzaben. Nel trescursu de la ofensiva, el comandante español, el xeneral Manuel Fernández Silvestre, penetró cuasi 130 km en territoriu enemigu, pero fízolo ensin construyir fuertes que protexeran la so retaguardia y ensin establecer un suministru afayaízu d'agua. Los territorios qu'ocupaba quedaben al cargu, pa la so defensa, de pequeños blocaos improvisaos, asitiaos en llugares altos y defendíos por pelotones de 12-20 soldaos. Estes estructures taben espardíes pel territoriu, ensin accesu a bones fontes d'agua y ensin comunicación fluida col cuerpu d'exércitu principal^[1].

El 22 de xunetu de 1922, tres de cinco díes d'escaramuces, 5.000 soldaos españoles qu'ocupaben el campamentu avanzáu d'Annual^[1] fueron atacaos por 3.000 rifeños. El xeneral Silvestre, qu'aportara al llugar el día anterior, decidió emprender la retirada siguiendo la llinia previamente utilizada p'avanzar. Un caberu mensaxe de radio, unviáu xustu anantes de les 5 la mañana, informó de la intención de Silvestre d'evacuar el campamentu esa mesma mañana. A les 10 de la mañana la guarnición entamó a salir, en formación de marcha, del campamentu, pero la falta d'un liderazgu claru y la falta de preparación de los soldaos fizo que lo qu'había ser una retirada ordenada convirtiérase rápidamente nuna huida desorganizada^[1]. Los reclutes españoles, sometíos a fueu intensu de los rifeños y agotaos pol calor, fuxeron en desbandada, y foron mataos, a balazos o acuchillaos, polos rifeños. Namái una xunidá de caballería, los Cazadores de Alcántara, caltuvieron la formación y foron capaces de retirase de forma organizada y respondiendo a los ataques de los bereberes.

Les tropes irregulares rifeñes taben dirixíes por Muhammad Ibn 'Abd al-Karim al-Khattabi (conocíu como Abd el Krim), un antiguu emplegáu civil de l'alministración española na Oficina d'Asuntos Indíxenes en Melilla y cabezaleru de les tribus de la cabila de Beni Urriaguel.

La estructura militar española na fastera occidental del protectoráu esbarrumbó. Tres de la batalla los bereberes entamaron el so avance hacia l'este, tomando y destruyendo más de 130 blocaos^[2]. Les guarniciones españoles foron destruyíes sin que los mandos foran capaces d'organizar una respuesta coordinada a los ataques. Pa finales d'agostu de 1921 España perdiera tolos territorios que conquistara na zona dende 1909^[2]. El xeneral Silvestre desapaeció, y los sos restos inxamás s'atoparon. Acordies con un informe, el sarxentu Francisco Basallo Becerra^[3]^[4] , de la guarnición de Kandussi, identificó los restos mortales del xeneral pola so faxa de xeneral. Un mensaxeru moru de Kaddur Namar, pela so banda, afirmó tener visto los restos del xeneral, ocho díes dempués del combate, nel campu de batalla^[5].

El repliegue español

La flota española entamó a evacuar a les guarniciones sobrevivientes nel enclave costeru d'Afrau. En Zoco el Telatza, en el sur, los militares y civiles españoles pudieron retirase a la zona de protectoráu francés. Los sobrevivientes de la batalla, pela so banda, aportaron, tres de 80 km de retirada, al estensu campamentu fortificáu de Monte Arruit, asitiáu al sur de Melilla y construyíu ente 1912 y 1916, nel que tentaron de resistir al mandu del xeneral Felipe Navarro. Arrodiaos pol enemigu y ensin posibilidá de recibir armes o alimentos, l'Altu Comisionáu español pal protectoráu, el xeneral Dámaso Berenguer Fusté, autorizó la so rendición el 9 d'agostu. Los rifeños nun respetaron les condiciones pactaes, y asesinaron a 3.000 soldaos españoles^[6]. El xeneral Navarro, xunto con 534 militares y 53 civiles, foi apresáu; toos ellos seríen rescataos dellos años dempués^[6].

Melilla taba namái a 40 km, pero nun podía unviar axuda a los sitiaos: les sos defenses yeren precaries, y la so guarnición taba formada por soldaos poco entrenaos. Los sobrevivientes d'Annual qu'aportaran a Melilla, arreventaos y desmoralizaos, tampoco yeren adecuaos pa reforciar la guarnición de la ciudá^[7]. La ciudá, por embargu, nun foi atacada. Los rifeños entamaron a dispersase tres de conquistar Monte Arruit, dexando a Abd el Krim con soldaos insuficientes pa sitiar Melilla. Amás, na ciudá vivíen ciudadanos d'otros países europeos, y el caudillu rifeñu nun quería correr el riesgu de provocar una intervención internacional. Más sero reconocería qu'esi tenía sío'l so mayor error.

España organizó rápidamente tropes de refuerzu, unviando a Melilla por mar, dende la fastera occidental del protectoráu, al sur de Tetuán, 14.000 soldaos de les unidaes d'élite del Exércitu d'Africa, mayormente lexonarios y Regulares. Esto aseguró la ciudá, y permitió reconquistar Monte Arruit a finales de payares.

El total d'españoles muertos n'Annual y los combates que-y siguieron puede llegar a los 20.000^[8]. L'historiador alemán Werner Brockdorff afirma que namái 1.200 de los 20.000 soldaos españoles salvaron la vida^[9], magar que a otros autores esta cifra de muertos paréz-yos desaxerada. Les baxes nel bandu de los rifeños, pela so banda, ascienden a 800^[10]. Les cifres oficiales finales, recoyíes nún informe presentáu ante les Cortes Xenerales, indiquen qu'en conxuntu, ente na propia batalla y na retirada a Melilla, el númberu de soldaos muertos foi de 13.192^[11]. No que cinca al armamentu capturáu polos rifeños, incluyía 11.000 rifles, 3.000 carabines, mil mosquetes, 60 ametralladores, cien cañones y grandes cantidaes de munición, amás de 2.000 caballos y 1.500 mules^[12] Abd el Krim diría dempués:"En solo una noche España mos proporcionó tol armamentu necesariu pa llibrar una gran guerra"^[12].

Les consecuencies

La crisis política provocada pol desastre d'Annual llevó a Indalecio Prieto a decir nel Congresu de los Diputaos: "Vivimos nel periodu más pronunciáu de la decadencia española. La campaña d'África representa un fracasu total y absolutu, ensin atenuantes, del exércitu español". El ministru de la Guerra ordenó la creación d'una comisión d'investigación, dirixida pol xeneral Juan Picasso González, qu'ellaboró l'informe conocíu como Expediente Picasso. Nelli detallábense bayura d'errores militares, pero gracies a les maniobres d'obstrucción desarrollaes por dellos ministros y xueces, d'elli nun se derivó la pitición de responsabilidaes polítiques por esta derrota que permanez nel imaxinariu coleutivu español como la mayor del exércitu español nos tiempos modernos^[13].

Ente les razones de la derrota avecen a mencionase los fallos de Silvestre na toma de decisiones táctiques y el fechu de que la mayoría de los soldaos españoles yeren reclutes con un entrenamientu perprobe. La opinión pública de la dómina culpó del desastre al rei Alfonsu XIII, que según delles informaciones animara y sofitara la irresponsable penetración del xeneral Silvestre a posiciones peralloñaes de Melilla dexando totalmente descuidada la so retaguardia. L'aparente indiferencia del rei cuando conoció la noticia provocó un llevantamientu popular escontra la monarquía. El rei, de veranéu nel sur de Francia, dixo según dellos testigos, al enterase del desastre que "la carne de pitu ta barato"; sicasí, otros cuenten el sucedíu afirmando que'l monarca, al conocer la cantidá de dineru que pidía Abd el Krim pol rescate de los oficiales que ficiera prisioneros en Monte Arruit, afirmó que "la carne de pitu ta caro". La crisis d'Annual, en fin, foi una de les primeres que, a lo llargo d'una década, fizo perder prestixu y popularidá a la monarquía española, facilitando qu'aportara la Segunda República.

Referencies

↑ ^1,0 ^1,1 ^1,2 Los 16 héroes de la Legión que defendieron el «Blocao de la muerte» contra cientos de rifeños, artículu del diariu ABC (10-08-2016).
↑ ^2,0 ^2,1 Sasse, Dirk, Franzosen, Briten und Deutsche im Rifkrieg 1921–1926, p. 40. Oldenbourg Wissenschaftsverlag, 2006, ISBN 3-486-57983-5
↑ El sarxentu Becerra foi un sobreviviente de la masacre de Dar Quebdani, na que 900 soldaos españoles foron asesinaos a sangre frío dempués de rendise.
↑ Annual: horror, masacre y olvido, artículu del diariu El País (22-03-2016).
↑ Pando, Juan, Historia Secreta de Annual, p. 335-6. Madrid, Ediciones Temas de Hoy, 1999.
↑ ^6,0 ^6,1 [1] Archiváu 2016-08-15 en Wayback Machine Flores en homenaje a los tres mil españoles pasados a cuchillo por los árabes hoy hace 95 años en Monte Arruit, artículu del diariu dixital Vozpopuli.com (09-08-2016).
↑ Sasse, 2006, page 41.
↑ Long, D.. E.; Reich, B., The Government and Politics of the Middle East and North Africa. p. 393. 2002.
↑ Brockdorff, W., Geheimkommandos des Zweiten Weltkrieges, Verlag Welsermühl, p. 168. 1967
↑ Ebert, J, Görich, K, Wienecke-Janz, D, Die große Chronik Weltgeschichte – Band 15 Der erste Weltkrieg und seine Folgen, p. 203.
↑ Woolman, D.S., Rebels in the Rif, p. 96. Stanford University Press
↑ ^12,0 ^12,1 Dirk Sasse, Franzosen, Briten und Deutsche im Rifkrieg 1921–1926, Oldenbourg Wissenschaftsverlag, 2006, ISBN 3-486-57983-5, p. 157.
↑ La derrota más amarga del Ejército español, artículu del diariu ABC