PROFILPELAJAR.COM

Cómic
	forma d'arte, xéneru lliterariu, forma lliteraria y afición
	arte visual, obra lliteraria, arte secuencial (es) , narrativa y illustrated work (en)

Nómase cómic^[1] o historieta^[2] a una narración fecha con una serie de dibuxos que constitúin un rellatu, con testu o ensin él, asina como al llibru o soporte (dixital, e-comic, etc.) que la contién.

Scott McCloud definiólo como «illustraciones yustapuestes y otres imáxenes en secuencia deliberada col envís de tresmitir información o obtener una respuesta estética del llector».

Estos dibuxos tán fechos enriba d'un soporte planu y estáticu. La integración de los testos nun bocadiellu (que ye'l nome que recibe l'espaciu destináu dientro la viñeta a colocar los testos) nun ye obligatoria yá qu'hai comic mudos.

El cómic entamó la so historia en 1829 cuando'l suizu Rodolphe Töpffer espublizó'l so primer álbum, masque munchos espertos dicen que los sos anicios tán fechaos nel Antiguu Exiptu colos xeroglíficos.

N'España destaquen dalgunos como Mortadelo y Filemón, creaos por Francisco Ibáñez, o Zipi y Zape, creaos por Escobar.

El cómic n'Asturies

La historia del cómic n'Asturies podríemos dicir qu'entama nos años venti de la mano d'Alfredo Truán y aporta con bona salú a los nuestros díes. Magar ello nun esistió n'Asturies una industria editora de cómic como la que se dio en Valencia o Cataluña, pero la historieta asturiana sí algamó un altu nivel de calidá y reconocimientu popular, sofitando la so presencia ente'l públicu nos periódicos, que se convirtieron nel vehículu que facía llegar el cómic a los llectores.

Arriendes d'esa presencia na prensa asturiana foi'l descomanáu ésitu d'un dibuxante, Alfonso Iglesias y d'unos personaxes, Pinón y Telva al que llueu acompañaría'l so sobrín, Pinín que, de la mano de La Nueva España, supunxo un importante fenómenu de mases demientres el franquismu. La sonadía algamada por Pinín foi tala que se-y preparó un recibimientu al personaxe de carne y güesu que llegaba a la Estación del Norte d'Uviéu y qu'aconceyó a un berbeneru de xente na capital del Principáu, idéntico a lo qu'asocedió con otru personaxe de la historieta, Tintín.

Bayura d'autores asturianos contribuyeron a escribir la historia d'esti arte, pero los qu'algamaron mayor reconocencia internacional son los hermanos de la Fuente, Víctor, Chiqui y Ramón; Adolfo Álvarez Buylla; Isaac del Rivero, padre y fíu, o'l propiu Alfonso Iglesias. Otros tuvieron un reconocimientu más llocal como Adolfo García, colos sos personaxes de La Familia Fariñones; Neto; Robert...

Anguaño hai otra xeneración de xente mozo que da continuidá al xéneru n'Asturies. Gaspar Meana, cola so Crónica de Leodegundo; Alberto Álvarez Peña, ilustrador de personaxes históricos y mitolóxicos; Igor Medio, que dio vida a la urbana familia Castañón; Sergio Bances; Ruma Barbero...

A afitar la importancia d'esti mediu n'Asturies tamién contribuyó Faustino Rodríguez Arbesú, guionista, críticu, comisariu d'esposiciones y editor d'El Wendigo. Esta revista entamó la so andadura nel añu 1974 y continúa güei la so andadura depués d'asoleyar más de cien númberos que son un resume de la historia d'esti arte y na que se puen lleer notables artículos sobre'l llinguax d'esti mediu d'espresión y na que collaboraron los dibuxantes más prestixosos del mundu de la historieta. Ente los méritos de la revista podría citase el recobramientu del llabor como historietista del pintor Eduardo Úrculo nos tiempos nos qu'entamaba'l so llabor como artista.

Tamién de la mano de Faustino Rodríguez Arbesú entámase anualmente en Xixón un Salón Internacional del Cómic, que trae a la ciudá a los más importantes dibuxantes, guionistes, editores y estudiosos, tanto locales como internacionales. Igualmente, n'Avilés tienen llugar tolos años unes Xornaes del Cómic con esposiciones, charres y otres actividaes populares. Dellos llugares d'Asturies celebraron actividaes asemayaes a lo llargo de los últimos años, aunque de menor proyeición que les entamaes en Xixón y Avilés.

Delles de les revistes que s'asoleyaron n'Asturies nes que se dio salida a la producción llariega, pero nun llegaron a enanchar la so influyencia más allá de les llendes del Principáu fueron: El Gomeru, El Llapiceru, Espolique, Tapón... Igualmente nel Principáu asoléyense dos revistes de crítica y estudiu de los tebeos: El Wendigo y Dentro de la viñeta.