PROFILPELAJAR.COM

Combate, o llucha ye una amarraza violenta aniciada ente dos o más persones o grupos en visu a forciar cada parte’l so dominiu sobre la contraria.

El términu combate refierse de cutiu a un conflictu armáu, llocalizáu n’espaciu y tiempu, ente fuercies militares en guerra, mientres que’l términu más xeneral de «llucha» suel referise a cualesquier amarraza violenta. La violencia en combate pue ser unillateral, mientres que la llucha implica como mínimo una reaición defensiva. Ensin embargu estos términos úsense davezu como sinónimos. Un combate a gran escala suel denomase «batalla». Nel terrén de los enfrentamientos personales avecen usase otros sinónimos de «llucha» como «engarrada», «engarradiella», «amarrada», «amarradiella», «griesca», etc. Esti caberu úsase muncho tamién a respeutive de los enfrentamientos coleutivos non bélicos.

Un combate pue desendolcase según delles regles o bien escarecer d'elles dafechu. Exemplos d'estes regles son les Convenciones de Xinebra (que s’ocupaben del tratamientu de los soldaos en tiempu de guerra), la caballería medieval, y les Regles del Marqués de Queensberry (referíes al boxéu).

El combate na guerra inclúi dos o más organizaciones militares opuestes, xeneralmente representando naciones en guerra (magar que la guerra de guerrilles y les campañes de desaniciu de les insurxencies pueden salise d'esta definición). La guerra ríxese poles lleis de guerra que gobiernen los sos propósitos y conducta, y protexen los derechos de los soldaos y de los non-combatientes.

El combate pue ser armáu o desarmáu. El combate a mano vacía tien llugar a una distancia percurtia, atacando al oponente con partes del cuerpu (golpes, pataes, estrangulamientos, etc.) y/o con dalgún arma propia pa la engarrada personal (armes blanques, palos, etc.), empara de les les armes de reglamentu o de les béliques.

El combate a mano vacía pue amás dividise en tres seiciones dependiendo de la distancia y allugamientu de los combatientes:

Llucha cuerpu a cuerpu
Llucha en suelu
Llucha de pie

Combate verbal

Esisten tamién delles formes d'aición pola pallabra rellacionaes colos enfrentamientos físicos y verbales rexistraes tanto na antigüedá como anguaño. Los patrones fixos d'aición pola pallabra emplegaos nun enfrentamientu verbal constitúin un fenómenu que s’alcuentra tanto en testos históricos como modernos. Anque les convenciones camuden col tiempu y d'una cultura a otra, los enfrentamientos ritualizaos paecen ser parte del inventariu d'usos del llinguax, y d'esta miente ye bien normal atopar semeyances ente les formes qu'individuos d'estremaes cultures remanen nun duelu verbal. El combate verbal pue derrocar en combate físicu algamáu ciertu puntu.

Pa más información

Wong, Leonard. 2006. «Combat Motivation in Today’s Soldiers: U.S. Army War College Strategic Studies Institute.»Armed Forces & Society, vol. 32: pp. 659–663. http://afs.sagepub.com/cgi/content/abstract/32/4/659
Gifford, Brian. 2005. «Combat Casualties and Race: What Can We Learn from the 2003-2004 Iraq Conflict?» Armed Forces & Society, vol. 31: pp. 201–225. http://afs.sagepub.com/cgi/content/abstract/31/2/201
Herspring, Dale. 2006. «Undermining Combat Readiness in the Russian Military, 1992-2005.» Armed Forces & Society, Jul 2006; vol. 32: pp. 513–531. http://afs.sagepub.com/cgi/content/abstract/32/4/513
Ben-Shalom, Uzi; Lehrer, Zeev; and Ben-Ari, Eyal. 2005. «Cohesion during Military Operations: A Field Study on Combat Units in the Al-Aqsa Intifada.» Armed Forces & Society, vol. 32: pp. 63–79. http://afs.sagepub.com/cgi/content/abstract/32/1/63 *Woodruff, Todd; Kelty, Ryan; Segal, David R. 2006. «Propensity to Serve and Motivation to Enlist among American Combat Soldiers.» Armed Forces & Society, Apr 2006; vol. 32: pp. 353–366. http://afs.sagepub.com/cgi/content/abstract/32/3/353
Dienstfrey, Stephen. 1988. «Women Veterans’ Exposure to Combat.» Armed forces & Society, vol. 14: pp. 549–558. http://afs.sagepub.com/cgi/content/abstract/14/4/549