Chus Lampreave

Chus Lampreave
Vida
Nacimientu Madrid, 11 d'avientu de 1930[1]
Nacionalidá España
Muerte Almería[2], 4 d'abril de 2016[3] (85 años)
Estudios
Llingües falaes castellanu
Oficiu actriz, actriz de cine
Premios
IMDb nm0483942
Cambiar los datos en Wikidata
Medaya d'Oru al Méritu nes Belles Artes, recibida en 2001.

María Jesús Lampreave Pérez[4] (11 d'avientu de 1930, Madrid – 4 d'abril de 2016, Almería), conocida como Chus Lampreave, foi una actriz española.

Biografía

Anque nunca tuvo vocación d'actriz, foi una de les más reconocíes y apreciaes del cine español, especialista en papeles d'actriz secundaria.[5][6] Participó en más de setenta películes y numberosos trabayos en televisión, collaborando colos más importantes direutores del país.

Entamos: Armiñán, Ferreri y Berlanga

En cursando'l bachilleratu y movida pol so gran afición a la pintura, ingresó na Academia de Belles Artes de San Fernando, onde coincidió col futuru pintor d'ésitu Antonio López. Per mediu de Jaime de Armiñán, en 1958, Chus fixo'l so debú como actriz en televisión. Los sos empiezos nel cine fueron de la mano de Marco Ferreri nos filmes güei clásicos El pisito y El carricoche, y con Luis García Berlanga, con quien trabayó dempués en películes tan emblemátiques como El verdugu y na triloxía Nacional: La escopeta nacional, Patrimoniu nacional y Nacional III. Otros filmes de la so primer etapa son Mi querida señorita y El amor del capitán Brando de Jaime de Armiñán.

Años 80: Almodóvar, Trueba...

Pero los mayores ésitos diben llega-y na década de 1980 y de la mano del direutor Pedro Almodóvar. Magar refugó papeles en Pepi, Luci, Bom y otras chicas del montón y en Laberinto de pasiones, Lampreave aportó a participar en Entre tinieblas (1983), y a partir d'entós collaboró en cuasi tolos filmes de Almodóvar: ¿Qué he hecho yo para merecer esto? (1984), Matador (1986), Mujeres al borde de un ataque de nervios (1988), La flor de mi secreto (1995), Hable con ella (2002), Volver (2006), Los abrazos rotos (2009)... Hai de solliñar que foi la única actriz que trabayó col manchegu con regularidá a lo llargo de tola so filmografía.

Actuó tamién para Fernando Trueba, en Sé infiel y no mires con quién (1985) y en El año de las luces (1986), equí con un papel que supón la primera de los sos seis candidatures al Premiu Goya. Especializada en personaxes inocentes o despistaos, adquirió mayor protagonismu en Espérame en el cielo (Antonio Mercero, 1988). Anovó la so complicidá con Berlanga participando en Moros y cristianos (1987) y Todos a la cárcel (1994).

El so historial inclúi otros títulos tan populares como Teresa de Jesús (1984) de Josefina Molina, Epílogu de Gonzalo Suárez, Amanece, que no es poco (1988) de José Luis Cuerda y Bajarse al moro (1989) de Fernando Colomo.

Últimos trabayos

Volvió collaborar con Trueba en Belle Époque (1992), película ganadora del Óscar a la meyor película de fala non inglesa y pola que Chus llogró'l Goya a la meyor actriz de repartu. Actriz y direutor repitieron collaboración en El artista y la modelo (2012).

Siguió participando en filmes de gran aceptación popular hasta los sos últimos años. En 1998 tuvo un papel destacáu (como madre del coprotagonista, Javier Cámara) na comedia Torrente, el brazo tonto de la ley, de Santiago Segura, que'l so enorme ésitu de taquilla daría orixe a una llarga y codalosa saga sobre'l pintorescu personaxe de José Luis Torrente. Lampreave retomaría dichu papel en 2014 en Torrente 5: Operación Eurovegas. Tamién tuvo un papel na esitosa comedia Fuera de carta (2008) de Nacho García Velilla y grabó diversos spots publicitarios.

En 2001 el Gobiernu d'España concedió-y la Medaya d'Oru al Méritu nes Belles Artes.[4]

L'actriz finó'l 4 d'abril de 2016 n'Almería.[7]

El so cuerpu foi incineráu el 5 d'abril de 2016.

Vida privada

El so home foi Eusebio Moreno de los Ríos (fináu'l 2 de xunetu de 2015). Tuvieron dos fíos: Diego y Laura (nacida en 1963 y finada en payares de 1996 a los 33 años tres una tarrecible enfermedá).

Filmografía (seleición)

Añu Película Direutor
1958 El pisito Marco Ferreri
1960 El carricoche Marco Ferreri
1963 El verdugu Luis García Berlanga
La becerrada José María Forqué
1971 Mi querida señorita Jaime de Armiñán
1974 El amor del capitán Brando Jaime de Armiñán
1977 La escopeta nacional Luis García Berlanga
1981 Patrimoniu nacional Luis García Berlanga
1982 Nacional III Luis García Berlanga
1983 Total José Luis Cuerda
1984 Entre tinieblas Pedro Almodóvar
¿Qué he hecho yo para merecer esto? Pedro Almodóvar
1985 Sé infiel y no mires con quién Fernando Trueba
Lulú de noche Emilio Martínez Lázaro
1986 Matador Pedro Almodóvar
El año de las luces Fernando Trueba
1987 La vida alegre Fernando Colomo
Moros y cristianos Luis García Berlanga
El pecador impecable Augusto Martínez Torres
1988 Espérame en el cielo Antonio Mercero
Mujeres al borde de un ataque de nervios Pedro Almodóvar
Miss Caribe Fernando Colomo
1989 Amanece, que no es poco José Luis Cuerda
Bajarse al moro Fernando Colomo
1992 Belle Époque Fernando Trueba
Supernova Juan Miñón
1994 Todos a la cárcel Luis García Berlanga
1995 Siete mil días juntos Fernando Fernán Gómez
Así en el cielo como en la tierra José Luis Cuerda
La flor de mi secreto Pedro Almodóvar
1997 Una pareja perfecta Francesc Betriu
1998 Torrente, el brazo tonto de la ley Santiago Segura
2002 El florido pensil Juan José Porto
Hable con ella Pedro Almodóvar
2004 Di que sí Juan Calvo
2006 Volver Pedro Almodóvar
2008 Fuera de carta Nacho G. Velilla
2009 Los abrazos rotos Pedro Almodóvar
2012 El artista y la modelo Fernando Trueba
2014 Torrente 5: Operación Eurovegas Santiago Segura

Televisión

Premios y candidatures

Festival Internacional de Cine de Cannes
Añu Categoría Película Resultáu
2006 Meyor actriz (en xunto col restu d'actrices) Volver Ganadora
Premios Goya
Añu Categoría Película Resultáu
1986 Meyor interpretación femenina de repartu El año de las luces Nomada
1988 Meyor interpretación femenina de repartu Espérame en el cielo Nomada
1989 Meyor interpretación femenina de repartu Bajarse al moro Nomada
1992 Meyor interpretación femenina de repartu Belle Époque Ganadora
1995 Meyor interpretación femenina de repartu La flor de mi secreto Nomada
2012 Meyor interpretación femenina de repartu El artista y la modelo Nomada
Fotogrames de Plata
Añu Categoría Trabayu Resultáu
1984 Meyor actriz de cine ¿Qué he hecho yo para merecer esto? Nomada
1986 Meyor actriz de cine El año de las luces
Lulú de noche
Matador		 Nomada
1988 Meyor actriz de cine Espérame en el cielo
Miss Caribe
Mujeres al borde de un ataque de nervios		 Nomada
1990 Meyor actriz de televisión Eva y Adán, agencia matrimonial Nomada
1993 Meyor actriz de televisión ¿De parte de quién? Semifinalista (1ᵉʳ ronda)
2005 Toa una vida Ganadora
Premios de la Unión d'Actores
Añu Categoría Película Resultáu
1995 Meyor interpretación secundaria de cine La flor de mi secreto Nomada
2006 Meyor actriz de repartu de cine Volver Ganadora
2008 Meyor actriz secundaria de cine Fuera de carta Nomada
2012 Meyor actriz secundaria de cine El artista y la modelo Nomada

Referencies

  1. ↑ Afirmao en: Internet Movie Database. Identificador IMDb: nm0483942. Data de consulta: 17 ochobre 2015. Llingua de la obra o nome: inglés.
  2. ↑ URL de la referencia: http://www.lavozdealmeria.es/Noticias/103852/5/Fallece-en-Almer%C3%ADa-Chus-Lampreave.
  3. ↑ URL de la referencia: http://www.elmundo.es/cultura/2016/04/04/570274a046163f697d8b45bd.html.
  4. ↑ 4,0 4,1 boe.es (17 de febreru de 2001). «Real Decretu 159/2001, de 16 de febreru, pol que se concede la Medaya al Méritu nes Belles Artes, na so categoría d'oru, a les persones y entidaes que se citen».
  5. ↑ Diariu ABC (ed.): «Cine de la Flor (por Jaime de Armiñán): La Carbonerita» (19 de marzu de 1993). Consultáu'l 2 d'avientu de 2012.
  6. ↑ «Chus Lampreave, secundaria de luxu con munches películes y poques entrevistes». Consultáu'l 8 d'abril de 2016. «Foi la gran secundaria del cine español y lo interesao ye que Chus Lampreave nun quería ser actriz. Quería ser pintora y cuntar en diverses ocasiones.»
  7. ↑ [1]

Enllaces esternos