Chongqing (en chinu simplificáu: 重庆; en chinu tradicional: 重慶; en pinyin: Chóngqìng; y en trescripción antigua: Chungking) ye una ciudá del suroeste de la República Popular China. La metrópolis, que tien l'estatus alministrativu de municipalidá, con control direutu pol gobiernu nacional, llenda cola provincia de Shaanxi al norte, cola de Guizhou al sur, les de Hubei y Hunan al este y la de Sichuan al oeste.
Chongqing
La municipalidá foi creada, a partir d'un nivel d'alministración subprovincial de la provincia de Sichuan, el 14 de marzu de 1997. El 29 d'abril de 2011 vivíen 28.846.170 habitantes, magar que na zona plenamente urbana viven namái 6 ó 7 millones de persones. Ye, colos sos 82.000 km² d'estensión, la mayor de les municipalidaes, y se sodivide en 19 distritos, 15 condaos y 4 condaos autónomos.
La ciudá yá tenía sío una municipalidá demientres l'alministración de la República de China, y foi la so capital na dómina de la Segunda Guerra Chino-Xaponesa (1937-1945). El so nome abreviáu (渝, Yú), que foi aprobáu oficialmente pol Conseyu d'Estáu el 18 d'abril de 1997, vién-y del antiguu nome del tramu del ríu Jialing qu'atraviesa la ciudá y llueu desemboca nel ríu Yangtze. La ciudá, que ye'l centru económicu de la cuenca alta d'esi ríu, ye un importante centru industrial y un importante nudu de comunicaciones.
La separación de la ciudá de la provincia de Sichuan tenía como oxetivu acelerar el so desarrollu y facer d'ella'l motor de crecimientu de les provincies interiores del oeste de China, que tán entre les más probes del país. La estratexa tuvo resultáu, y la ciudá urbanízase rápidamente. Les estadístiques amuesen que diariamente aumenta la cantidá de suelu utilizable (pa espaciu, residencial, comercial o industrial) en 137.000 m² y lleguen a la ciudá 1.300 persones.
La ciudá ye la que más motocicletes produz del país y la tercera en producción de coches, con delles fábriques d'empreses chines y foriates (Ford Motor Company tien trés fábriques na municipalidá); ye, tamién, ún de los nueve principales centros siderúrxicos del país y una de les trés que más aluminiu produz. Sicasí, hai tamién una bayurosa producción agrícola (arroz, naranxes...) y minera, y ta proyectao construyir nella una refinería con 10 millones de tonelaes de capacidá.
.svg)
