Andrew Lloyd Webber, Barón Lloyd-Webber[11][12] (22 de marzu de 1948, Kensington) ye unu de los compositores teatrales más nomaos de finales del sieglu XX con obres que se caltuvieron con gran ésitu tantu en Broadway como nel West End londinense. Compositor, escritor, autor, productor, direutor y realizador de numberoses obres de teatru mas famoses y con gran ésitu, ye un iconu de Broadway.
La so primera esposa foi Sarah Hugill, cola que casó en 1972 y de la que se divorció en 1981. La pareya tuvo dos fíos: Imogen y Nicholas. En 1982 casó cola cantante y baillarina Sarah Brightman. El matrimoniu concluyó en 1990. Andrew Lloyd Webber casóse de nuevo en 1991 cola que ye n'actualidá (2010) la so muyer, Madeleine Gurdon, cola que tuvo trés fíos: Alastair, William y Isabella.
En 1992, Andrew Lloyd Webber foi nomáu caballeru del Imperiu Británicu y en 1997 recibió'l títulu de Barón de Lloyd-Webber de Sydmonton nel condáu de Hampshire. Participó viviegamente'n política como miembru del Partíu Conservador y llegó a componer música pa dellos alcuentros políticos, anque apocayá alloñóse del Conservadorismu. Ye, amás, un reconocíu coleicionista de pintura victoriana; adquirió amás un importante retratu de Picasso qu'en fecha recién volvió vender.
Carrera profesional
Lloyd Webber tuvo una serie d'ésitos consecutivos mientres los años 70 y 80 collaborando col lletrista Tim Rice. Los dos recibieron l'encargu d'escribir Joseph and the Amazing Technicolor Dreamcoat (Xosé'l suañador) pal institutu d'Edimburgu. El musical foi un ésitu; delles partes de la obra reescribiéronse y presentáronse nel Festival d'Edimburgu. Lloyd Webber y Rice siguieron collaborando y producieron Xesucristu Superstar y Evita. Dambes editáronse primero n'álbumes antes de llevales al escenariu. Tres l'estrenu d'Evita, la collaboración ente dambos rompióse.
Pal llibretu de la obra Cats, Lloyd Webber basóse nuna obra de T.S. Eliot, Old Possum’s Book of Practical Cats, obra que foi una de les favorites de la infancia de Lloyd Webber. Cats convirtióse na obra musical que más tiempu tuvo en cartel: más de 20 años. Dempués escribió Starlight Express y una adautación del rellatu de La pantasma de la ópera qu'escribió Gastón Leroux.
En 2009 creó'l cantar que representó al Reinu Xuníu nel Festival de la Canción d'Eurovisión de 2009 en Moscú, «My Time», interpretáu por Jade Ewen. Lloyd Webber propúnxose como reto devolver al Reinu Xuníu les bones posiciones qu'algamaron anteriormente nesti concursu y consiguiólo, llevando'l cantar al quintu puestu na final. Acompañó a Jade al pianu na so actuación.