অসম বিধানসভা নিৰ্বাচন, ২০০১

১৯৯৬ ← → ২০০৬

অসম বিধানসভাৰ সমগ্ৰ ১২৬টা সমষ্টি সংখ্যাগৰিষ্ঠতাৰ বাবে ৬৪ খন আসনৰ প্ৰয়োজন ভোটদানৰ হাৰ ৭৫.০৫%   সংখ্যাগৰিষ্ঠ দল সংখ্যালঘিষ্ঠ দল   নেতা তৰুণ গগৈ প্ৰফুল্ল কুমাৰ মহন্ত দল কংগ্ৰেছ অগপ নেতাৰ আসন তিতাবৰ বঢ়মপুৰ

অসম বিধানসভাৰ সমষ্টিসমূহ

নিৰ্বাচনৰ পূৰ্বৰ মুখ্যমন্ত্ৰী প্ৰফুল্ল কুমাৰ মহন্ত অগপ নিৰ্বাচিত মুখ্যমন্ত্ৰী তৰুণ গগৈ কংগ্ৰেছ

২০০১ৰ অসম বিধানসভা নিৰ্বাচন অসমৰ একাদশ বিধানসভা গঠন কৰিবলৈ অনুষ্ঠিত হয়। ভোটদানৰ হাৰ আছিল ৭৫.০৫%। এই নিৰ্বাচনে গুপ্তহত্যা, বিত্তীয় সংকট আদিয়ে জুৰুলা কৰা অসম গণ পৰিষদৰ চৰকাৰখনৰ পতন মাতি আনিছিল। ৭১খন আসনেৰে নিৰংকুশ সংখ্যাগৰিষ্ঠতা লাভ কৰি ভাৰতীয় জাতীয় কংগ্ৰেছে তৰুণ গগৈৰ নেতৃত্বত চৰকাৰ গঠন কৰে। ২০খন আসন লাভ কৰি অগপই বিৰোধীৰ আসনত বহে।^[1]

২০০১ চনৰ নিৰ্বাচনত অসম গণ পৰিষদে ভাৰতীয় জনতা পাৰ্টিৰ সৈতে জোটবন্ধন কৰে, যাৰবাবে তেওঁলোকৰ পূৰ্বৰ জোটবন্ধনৰ অংশীদাৰী দল চি.পি.আই. আৰু চি.পি.আই. (এম) আঁতৰি যায়। অগপ আৰু বিজেপিৰ মিত্ৰতাই কংগ্ৰেছৰ বাবে প্ৰবল প্ৰত্যাহ্বানৰ সৃষ্টি কৰিছিল; যাৰবাবে কংগ্ৰেছে প্ৰথমবাৰৰ বাবে সৰু সৰু দলবোৰৰ সৈতে মিত্ৰতাৰ প্ৰয়োজনীয়তা অনুভৱ কৰে। কংগ্ৰেছে ৰাজ্যখনৰ আটাইকেইটা সমষ্টিতে প্ৰাৰ্থী দিয়ে আৰু ৩৯.৭৫ শতাংশ ভোটৰে ৭১খন আসনত জয়ী হয়। অগপই লাভ কৰা আসনৰ সংখ্যা আছিল ২০খন আৰু তেওঁলোকৰ ভোটৰ শতাংশ হ’ল ২০.০২। আনহাতে ৯.৩৫ শতাংশ ভোট লাভেৰে বিজেপিয়ে ৮খন আসনত দখল সাব্যস্ত কৰি তৃতীয় স্থানত থাকে।^[2]

এইটো নিৰ্বাচনত মুঠ ২৭টা ৰাজনৈতিক দলে অংশগ্ৰহণ কৰে। ইয়াৰে ৫টা ৰাষ্ট্ৰীয়, ১২টা ৰাজ্যিক আৰু ১০টা পঞ্জীভূক্ত, কিন্তু নিৰ্বাচন আয়োগৰ স্বীকৃতি নোপোৱা দল আছিল। ৩৯৩জন লোকে নিৰ্দলীয় সদস্যৰূপে অৱতীৰ্ণ হয় আৰু ইয়াৰে ১৯জন বিধানসভালৈ নিৰ্বাচিত হৈ আহে।^[1]

অসমৰ মুখ্যমন্ত্ৰীৰ দায়িত্ব গ্ৰহণ কৰাৰ সময়ত তৰুণ গগৈ কলিয়াবৰ লোকসভা সমষ্টিৰ সাংসদ ৰূপে কাৰ্যনিৰ্বাহ কৰি আছিল। মুখ্যমন্ত্ৰী হোৱাৰ পিছত তেওঁৰ ভাতৃ দীপ গগৈয়ে দখল কৰি থকা তিতাবৰ বিধানসভা সমষ্টিটো এৰি দিয়ে। ফলস্বৰূপে তিতাবৰত উপনিৰ্বাচন অনুষ্ঠিত হয় আৰু তাৰপৰা তৰুণ গগৈ বিজয়ী হৈ আহে।^[3]