অসম বিধানসভা নিৰ্বাচন, ১৯৮৫

১৯৮৩ ← ১৯৮৫ → ১৯৯১

নিৰ্বাচনৰ পূৰ্বৰ মুখ্যমন্ত্ৰী হিতেশ্বৰ শইকীয়া কংগ্ৰেছ মুখ্যমন্ত্ৰী প্ৰফুল্ল কুমাৰ মহন্ত অগপ

১৯৮৫ৰ অসম বিধানসভা নিৰ্বাচন ৮ম বিধানসভাৰ ১২৬খন আসনৰ সদস্য নিৰ্বাচন কৰিবলৈ দুটা স্তৰত অনুষ্ঠিত হৈছিল।^[1][2] নিৰ্বাচনত অসম গণ পৰিষদে ৬৪খন আসন লাভ কৰি প্ৰফুল্ল কুমাৰ মহন্তৰ নেতৃত্বত চৰকাৰ গঠন কৰিছিল। অসম গণ পৰিষদ আছিল এক নতুনকৈ গঠিত দল।^[3] নিৰ্বাচনৰ পিছতহে অগপই ৰাজনৈতিক দল হিচাপে ভাৰতৰ নিৰ্বাচনী আয়োগৰ স্বীকৃতি পায়। সেয়েহে ১৯৮৫ত একেলগে অনুষ্ঠিত হোৱা অসমৰ লোকসভা আৰু বিধানসভা নিৰ্বাচনত অগপই হাতীৰ নিৰ্বাচনী চিহ্ন লৈ নিৰ্দলীয় ৰূপে অৱতীৰ্ণ হৈছিল৷^{[উদ্ধৃতিৰ প্ৰয়োজন]}

ছয় বছৰ ধৰি চলা অসম আন্দোলনৰ পৰিসমাপ্তি ঘটাবলৈ প্ৰধানমন্ত্ৰী ৰাজীৱ গান্ধীয়ে প্ৰচেষ্টা হাতত লয়। ১৯৮৫ চনৰ ১৫ আগষ্টৰ মাজনিশা প্ৰধানমন্ত্ৰী ৰাজীৱ গান্ধীৰ উপস্থিতিত কেন্দ্ৰীয় চৰকাৰ আৰু অসম আন্দোলনৰ নেতৃবৃন্দৰ মাজত এখন চুক্তি স্বাক্ষৰিত হয়। কেন্দ্ৰীয় চৰকাৰে তদানিন্তন বিধানসভাখন ভঙ্গ কৰি নতুনকৈ নিৰ্বাচন পাতিবলৈও সন্মত হয়। সেই মৰ্মে ১৮ আগষ্টত অসম বিধানসভা ভঙ্গ কৰি দিয়া হয়। আগন্তুক নিৰ্বাচনত অংশগ্ৰহণ কৰিবলৈ আন্দোলনৰ নেতৃবৃন্দই এটা নতুন ৰাজনৈতিক দল খোলাৰ যো-যা কৰে। গোলাঘাটত অনুষ্ঠিত হোৱা এখন ৰাজনৈতিক অভিবৰ্তনত ১৫ অক্টোবৰত প্ৰফুল্ল কুমাৰ মহন্তৰ নেতৃত্বত অসম গণ পৰিষদ নামেৰে এটা নতুন দল খোলা হয়। অসম আন্দোলনৰ অংশীদাৰ পূৰ্বাঞ্চলীয় লোক পৰিষদ আৰু গণ সংগ্ৰাম পৰিষদে নিজৰ সুকীয়া অস্তিত্ব বিলিন কৰি নতুন ৰাজনৈতিক দলত যোগ দিয়ে।^[3]

ইফালে অসম চুক্তিৰ বিৰোধিতা কৰি সেই একে বছৰতে সদৌ অসম সংখ্যালঘু ছাত্ৰ সন্থা, নাগৰিক অধিকাৰ সংৰক্ষণ কমিটি (CRPC) তথা কিছুমান ভাষিক আৰু ধৰ্মীয় সংখ্যালঘু সংগঠনৰ উদ্যোগত কালিপদ সেনৰ সভাপতিত্বত সংযুক্ত সংখ্যালঘু মৰ্চ্চা, অসম (UMFA) নামেৰে এটা নতুন ৰাজনৈতিক দলৰো জন্ম হয়। এই দলটোৱে মূলত বাংলাভাষী হিন্দু আৰু পূৰ্ববঙ্গীয় মূলৰ মুছলমানসকলৰ সমৰ্থন লাভ কৰিছিল।^[4]

১৬ ডিচেম্বৰত নিৰ্বাচন অনুষ্ঠিত হয়। ২৪ ডিচেম্বৰত নেহৰু ষ্টেডিয়ামত প্ৰফুল্ল মহন্তৰ চৰকাৰে শপত গ্ৰহণ কৰে।^[3]

ভাৰতৰ নিৰ্বাচনী আয়োগৰ স্বীকৃতিপ্ৰাপ্ত ৭টা ৰাষ্ট্ৰীয় পৰ্যায়ৰ আৰু ২টা ৰাজ্যিক পৰ্যায়ৰ ৰাজনৈতিক দলে অংশগ্ৰহণ কৰে।

1. ভাৰতীয় জনতা পাৰ্টী (BJP)
2. ভাৰতীয় জাতীয় কংগ্ৰেছ (INC)
3. ভাৰতৰ কমিউনিষ্ট পাৰ্টী (CPI)
4. ভাৰতৰ কমিউনিষ্ট পাৰ্টী (মাৰ্ক্সবাদী) (CPM)
5. ভাৰতীয় কংগ্ৰেছ (সমাজবাদী) (ICS)
6. জনতা পাৰ্টী (JNP)
7. লোকদল (LKD)
8. অসম ভৈয়াম জনজাতি পৰিষদ (ৰাজ্যিক পৰ্যায়ৰ) (PTC)
9. ৰিভ'লুচনাৰী ছোচিয়েলিষ্ট পাৰ্টী (ৰাজ্যিক পৰ্যায়ৰ) (RSP)

ইয়াৰে ভাৰতীয় জাতীয় কংগ্ৰেছে ২৫খন, সমাজবাদী কংগ্ৰেছে ৪খন, ভৈয়াম জনজাতি পৰিষদে ৩খন আৰু মাৰ্ক্সবাদী কমিউনিষ্ট পাৰ্টীয়ে ২খন আসনত বিজয় সাব্যস্ত কৰে। বাকী ৫টা স্বীকৃতিপ্ৰাপ্ত দলে এখনো আসন লাভ কৰা নাছিল^[1]

১৯৮৫ৰ নিৰ্বাচনত নৱগঠিত অসম গণ পৰিষদ আৰু সংযুক্ত সংখ্যালঘু মৰ্চা, অসমেও নিৰ্দলীয় ৰূপে, কিন্তু নিজা দলীয় প্ৰতীক চিহ্নৰে নিৰ্বাচনত অৱতীৰ্ণ হয়। নিৰ্বাচন হৈ যোৱাৰ পিছতহে এই দুয়োটা দলে নিৰ্বাচনী আয়োগৰ স্বীকৃতি লাভ কৰে। ৬৪খন^[3] আসন লাভ কৰি অগপই চৰকাৰ গঠন কৰে। সংযুক্ত সংখ্যালঘু মৰ্চ্চাই লাভ কৰা আসনৰ সংখ্যা ১৭খন।^[3]

১৯৮৫ৰ নিৰ্বাচনত প্ৰফুল্ল কুমাৰ মহন্তই ২খন আসনত জয়লাভ কৰাত ৮৯-কলিয়াবৰ আসনখন এৰি দিয়ে। ইফালে হিতেশ্বৰ শইকীয়া মিজোৰামৰ ৰাজ্যপাল হৈ যোৱাত ১০৪-নাজিৰা সমষ্টিৰ বিধায়কৰ পৰা পদত্যাগ কৰে। সেয়েহে এই দুটা সমষ্টিত ১৯৮৬ চনত উপ-নিৰ্বাচন অনুষ্ঠিত হয়। নাজিৰা সমষ্টিৰ পৰা তনু কোঁৱৰ আৰু কলিয়াবৰ সমষ্টিৰ পৰা গুণীন হাজৰিকা বিজয়ী হয়।^[2] দুয়োগৰাকী অসম গণ পৰিষদৰ প্ৰাৰ্খী আছিল।