محمد يسرى سلامة
معلومات شخصيه
الميلاد	1 اكتوبر 1974   اسكندريه
تاريخ الوفاة	24 مارس 2013 (39 سنة)[1]
سبب الوفاة	مرض معدى
مواطنه	مصر
الحياه العمليه
المهنه	لغوى ،  وكاتب
اللغه الام	اللغه المصريه الحديثه
اللغات المحكيه او المكتوبه	عربى ،  واللغه المصريه الحديثه
تعديل مصدري - تعديل

محمد يسرى سلامة (1 اكتوبر 1974 - اسكندريه - 24 مارس 2013 - اسكندريه) دكتور أسنان و سياسى و كاتب و باحث مصرى. كان المتحدث الرسمى لحزب النور السلفى لفترة صغيره قبل ما يسيبه احتجاج على سياسة و مواقف الحزب و بقى من مؤسسيين حزب الدستور ، اللى بقى من قيادته مع محمد البرادعى و مجموعة مثقفيين و نشطاء زى جورج اسحاق ،الدكتور علاء الاسوانى و الدكتور احمد حرارة و غيرهم ، كمان كان من مؤسسيين حركة سلفيو كوستا.

اتولد سلامة فى اسكندريه يوم 1 اكتوبر 1974 ، ودرس طب الأسنان فى جامعة اسكندريه.والده هو الدكتور يسرى محمد سلامة، الاستاذ بكلية الاداب ف جامعة الاسكندرية ، ووالدته الشاعرة الاسكندرانيه عزيزة عبد الوهاب كاطو.

نزل و شارك فى ثورة 25 يناير ، فى الوقت ان معظم السلفيين رفضوا المشاركة و شيوخ السلفيين حرموا النزول فى المظاهرات ، قال بعد كدا على قرار نزوله و مشاركته فى الثورة «حررته من سجن الخوف الى غير رجعة» . اتصاب فى الثورة و ده اللى خلاه ميقدرش يشتغل شغلته الاساسية كدكتور أسنان و استغل حبه للتراث العربى و ده اللى خلاه ينضم لمركز المخطوطات بمكتبة اسكندريه كباحث و مترجم.

بالرغم ان سلامة بيعرف نفسه انه سلفى المذهب و انه اتربى و اتعلم من شيوخ سلفيين فى اسكندريه، انما كان بيرفض استخدام الدين فى السياسة و تدخل الشيوخ فى الامور السياسية ، و كان شايف انها بتسبب اضرار كبيره للدين ، و كان بيعارض معظم قرارات التيار العام للسلفيين و الاخوان و كانت بتعتبر افكاره ثوريه جامد على تيارات الاسلام السياسى ، و عشان كده اتهاجم من السلفيين و الاخوان. و قال «إذا كانت الحرية والعدالة او مصر القوية او الوسط احزابا اسلامية فالدستور حزب اسلامي، و إذا كانت علمانية فهو علماني، وذلك لأن دى الاحزاب لا تدعو الى تحكيم الشريعة بمعناها الشامل بما فيها الحدود و إلزام الناس بأحكام الشرع، و علشان كده تستوى كلها مع تنوع الشعارات، ولا احد عايز تعديل المادة التانيه لا بزيادة ولا بنقصان».

الدكتور محمد يسرى سلامه كان بيكتب مقالات فى جرايد زى الشروق و المصرى اليوم و جرنال الدستور ، جنب كده كتب مجموعة الكتب المهنية و كتب تانيه زى

• "التعريف بابن تيمية للشيخ محمد ابو زهرة"
• "النشأة العلمية لابن تيمية وتكوينه الفكرى للمستشرقين هنرى لاووست"
• "رياض الأزهار فى معانى الألفاظ الشرعية والأدعية والأذكار"

توفى الدكتور محمد يسرى سلامة يوم الحد 24 مارس 2013 بعد صراع قصير مع المرض بعد ما اتصاب بميكروب فى المعدة ، جنازته كانت فى اسكندريه و حضرها عدد كبير من السياسيين من كل الاتجاهات.

• http://www.almasryalyoum.com/node/1590516

1. ↑ Egyptian political leader Mohamed Yousry Salama dead at age 38