افتتحت البطوله السبعتاشر يوم 24 سبتمبر 2009 بحضور حسنى مبارك رئيس مصر و جوزيف س. بلاتر رئبس اتحاد الفيفا فى استاد اسكندريه اكبر استاد كوره فى افريقيا و الشرق الاوسط. و كانت اول مباراه بين منتخب مصر و منتخب ترينيداد و توباجو و كسبت مصر الماتش 4 - 1.
كسب منتخب مصر على منتخب ايطاليا اللى بيعتبر من اقوى الفرق الاوروبيه و عدى للدور الستاشر لكن خسر فى الدور ده من كوستاريكا و كانت من مفاجاءات البطوله.
اتختمت البطوله الناجحه فى استاد القاهره الضخم يوم 16 اكتوبر 2009 بحضور حوالى 61 الف مشجع و احمد نظيف رئيس وزرا مصر و جوزيف س. بلاتر رئيس الفيفا و عيسى حياتو رئيس الاتحاد الإفريقى بعد الماتش النهائى بين برازيل و غانا اللى انتهى بفوز غانا بالبلنتيات 4 - 3 بعد ما انتهى الماتش و الوقت الاضافى بالتعادل 0 - 0. و بكده كسبت غانا ببطولة العالم تحت 20 سنه كأول فريق افريقى يكسب بيها فى تاريخ البطوله و ده انجاز كبير للكوره الافريقيه و لمنتخب غانا اللى لعب قدام فريق كبير بعشر لعيبه بعد ما اخد لعيب غانى كارت احمر من الحكم البلجيكى فرانك دى بليكير Frank DE BLEECKERE فى الشوط الاولانى.
زائد كاس البطوله اخد اللعيب الغانى دومينيك اديياه Dominic Adiyiah جايزة احسن لعيب فى البطوله و جايزة هداف البطوله بعد ما دخل تمن تجوان فى الماتشات.
جنب التنظيم الرائع بتعتبر بطوله مصر 2009 من انجح بطولات العالم للشباب اللى اتعملت و اتسجل فى الماتشات اعلى عدد اجوان فى تاريخ البطوله ( 167 جون ) ، و الحضور الجماهيرى حقق رقم قياسى فى تاريخ البطوله ( مليون و 227 الف و 958 متفرج ).
أكتر فريق أخد تجوان كان فريق تاهيتى اللى اخد 21 جون فى تلت متشات. تاهيتى جزيره صغيره فى الباسيفيك ما لهاش باع كروى و جميل انها اشتركت فى البطوله و عبر لعيبتها عن فرحتهم بزيارة مصر و انهم شافو الاهرامات.
فى لفته حضاريه و عرفان بتنظيم مصر للبطوله و تشجيع المصريين للفريق الغانى رفع لعيبة غانا علم مصر على منصة استلام كاس البطوله.
جوزيف س. بلاتر رئيس الاتحاد الدولى لكرة القدم ( الفيفا ) عمل مؤتمر صحفى شكر مصر فيه و قال : " إن جودة تنظيم البطوله و الملاعب و البنيه التحتيه فى مصر كانت مدوره لأعلى المعايير على كل المستويات. و أظهر نجاح مصر فى استضافة البطولة قدرتها من غير شك على تنظيم نهائيات كاس العالم فى يوم من الايام ".
