كابو ڤيردا Cabo Verde ، الراس الخضرا ، ( بالعربى: الرأس الاخضر ، بالانجليزى كاب فيردى Cape Verde ). جمهورية كابو فيردا República de Cabo Verde هى دوله افريقيه عباره عن أرخبيل بتتكون منه مجموعة جزر فى شرق المحيط الاطلنطى ، قدام ساحل افريقيا الغربى قدام موريتانيا و السينيجال. كابو ڤيردا مساحتها حوالى 4،000 كيلومترا مربع (1،500 ميل مربع) , عدد السكان حوالى 500،000 . عاصمة كابو ڤيردا هى مدينة برايا Praia. اللغه الرسميه برتغالى. عملتها: اسكودو كابو فيردى Escudo do Cabo Verde ، رئيسها الحالى هو بيدرو بيريس Pedro Pires . ديانة معظم السكان: مسيحيه كاتوليكيه. الاقتصاد بيعتمد على السياحه و صيد الأسماك و تصدير الملح الطبيعى. فى سنة 2010 زار الجزر حوالى 380.000 سايح. فيه اعداد كبيره من الكابوفيرديين عايشين فى پورتوجال و اعداد من البرتغاليين عايشين فى كابو فيردا بسبب الارتباط التاريخى بين البلدين ان كابو فيردا كانت زمان مستعمره برتغاليه ، و غير البرتغاليين فيه كمان اوروبيين بيعيشو فى الجزر و بالذات الطليانه اللى بيتركزو فى جزيرة بوا فيستا بسبب امتلاكهم اعداد من الاوتيلات و الرستورانات. معدل الجريمه فى كابو فيردا منخفض الجزر مافيهاش حيوانات خطره زى الوحوش و التعابين لكن فيها طيور و حشرات و حيوانات أليفه و نسانيس ( فى شمال جزيرة سانتياجو ) ، ومافيهاش امراض وبائيه مستوطنه لكن حالات حمى الدينجو بتظهر ساعات فى المناطق الغابيه بسبب الناموس لكن فى العاده مابتمثلش وباء ضخم لدرجه تهدد السياحه و نادر ظهورها فى الجزر اللى مافيهاش غابات زى جزر سال او بوا فيستا.
اهم جزرها : سانتياجو Santiago اللى فيها العاصمه برايا ، و جزيرة سال Sal اللى بتعتبر اهم جزر كابو فيردا السياحيه بسبب بلاچاتها الجميله و فيها اعداد كبيره من الأوتيلات. كلمة " سال " برتغاليه معناها " ملح " اللى اتسمت الجزيره على اسمه بسبب انتشار ملاحات الملح الطبيعى فيها ، و جزر برافا Brava ، و ساو فيسينتا Sao Vicente ، و بوا فيستا Boa Vista القريبه من جزيرة سال و مشهوره ببلاچاتها الصالحه للغطس و الويند سورفينج ، و مايو Maio ، و ساونيكولاو Sao Nicolau ، و سانتو انتاو Santo Antao اللى جنب جزيرة ساو فيسينتا و فيها مناظر طبيعيه خلابه ، و فوجو Fogo اللى من معالمها بركان قمته بيكو دو فوجو Pico do Fogo هى اعلى قمه فى الأرخبيل. كابو فيردا عندها شركة طيران اسمها TACV- Cabo Verde Airlines بتربطها باوروبا و افريقيا عن طريق مطارين دوليين واحد فى جزيرة سال ( مطار اميلكار كابرال الدولى Amílcar Cabral International Airport ) و التانى مطار احدث فى جزيرة برايا ( مطار برايا الدولى Praia International Airport ) ، غير المطارين دول فيه مطارات صغيره فى غالبية الجزر بتستخدم فى النقل الداخلى و النقل الدولى ، و فيه باخره ركاب كبيره بتنقل المسافرين و السياح يوماتى مابين جزيرة ساو فيسينتا و سانتو انتاو القريبين من بعض.
التقسيمات الإدارية
تنقسم جمهورية كابو فيردى إداريا ل22 بلدية هيا بدورها مقسمة ل32 بلديه.
