سليمان محمد عبد الحميد خاطر (3 مارس 1961 - 7 يناير 1986) جندى مصرى .
نشأته
اتولد سليمان خاطر سنة 1961 فى قرية اكياد البحريه فى مركز فاقوس فى محافظة الشرقيه فى مصر ، وفى سنة 1979 اخد شهادة الثانوية العامة ودخل كلية الحقوق فى جامعة الزقازيق . وبعدما اتخرج من الكلية استدعاه الجيش المصرى علشان يقضى فترة التجنيد الإجبارى وتم ضمه لقوات الأمن المركزى و كان مكان خدمته فى منطقة رأس برقة فى محافظة جنوب سينا الموجودة على الحدود بين مصر و اسرائيل .
حادثة رأس برقة
فى يوم 5 اكتوبر 1985 كان سليمان خاطر قايم بنوبة الحراسة المكلف بيها وشاف 11 سايح اسرائيلى حاولوا يطلعوا الهضبة اللى موجود فيها نقطة الحراسة اللى هو تبع يها ، قام ضرب ناحيتهم كام رصاصة من بندقيته الميرى بهدف التحذير علشان يقفوا مكانهم لكنهم ماوقفوش و استمروا فى المشى ناحيته فاضطر انه يضربهم فى المليان وقتل سبعة منهم و جرح ال 4 الباقيين .
محاكمة سليمان خاطر
بعد الحادثة دى سليمان خاطر سلم نفسه وسلم سلاحه ، بعد كده صدر قرار جمهورى بتقديمه لمحاكمة عسكرية حسب قانون الطوارئ ، و كان محاميه فى القضية هو حازم صلاح أبو إسماعيل اللى طعن فى القرار الجمهورى بهدف تقديم سليمان خاطر للمحاكمة قدام قاضيه الطبيعى (محكمة الجنايات) لكن تم رفض الطعن . و فى التحقيق مع سليمان خاطر كان بيقول دايما أنه قام بالواجب اللى عليه و أنه نفذ التعليمات اللى اخدها من رؤساؤه .
فى يوم 28 ديسمبر 1985 اتحكم على سليمان خاطر بالأشغال الشاقة المؤبدة واترحل على السجن الحربى فى مدينة نصر بالقاهره علشان يقضى فترة العقوبة .
وفاته
فى يوم 7 يناير 1986 اتعلن عن انتحار سليمان خاطر فى السجن بناء على تقرير الطب الشرعى . لكن بعد كده شاف اكتر من دكتور جثمان سليمان خاطر انه ظاهر فيه اثار ضرب و سحل على الأرض مع اثار خنق على رقبته ، ده غير تعليق افراد اسرة سليمان خاطر بأنه كان متدين و أنه مش ممكن يفكر فى الانتحار مهما حصل .
مصادر
لينكات برانيه
لم يتم العثور على روابط لمواقع التواصل الاجتماعي.
