انا كومنينا - باليونانى : Άννα Κομνηνή - ( اتولدت 1 ديسمبر1083 - اتوفت حوالى 1153 )، اميره و مؤرخه بيزنطيه. بنت الامبراطور البيزنطى اليكسيوس الاول كومنينوس ( حكم 1081 - 1118 ). كتبت كتابها التاريخى " الكسيادا " ( Αλεξιάδα ) اللى بيعتبر اول كتاب تأريخى كبير تكتبه واحده ست، واللى كمان بيعتبر من اشهر و أهم المصادر عن أحداث فترة حكم الامبراطور اليكسيوس الاول و الحمله الصليبيه الاولى.
اتخطبت فى صباها لقسطنطين دوكاس إبن الامبراطور ميخائيل السابع دوكاس ( حكم 1071 - 1078 ) لكن لأسباب مش واضحه الجواز ما تمش واتجوزت نيكيبوروس برينيوس اللى كان من عيله ارستقراطيه كبيره من منطقة غرب الامبراطوريه البيزنطيه. انا و جوزها بقت ليهم مكانه كبيره فى البلاط البيزنطى فى فترة حكم اليكسيوس الاول و بعد ما اتوفى حاولوا يستولو على العرش على حساب وريث العرش جون التانى كومنينوس اخو انا كومنينا الصغير ( 1118 - 1143 ) لكن المؤامره اتكشفت واتنفت انا كومينينا نفى داخلى لدير عاشت فيه لغاية وفاتها حوالى سنة 1153.
انا كومنينا قضت وقتها فى الدير فى كتابة ال " الكسيادا " اللى كتبته بإسلوب أدبى متمكن فى الفتره ما بين 1143 و 1153 و بقى واحد من اشهر النصوص التاريخيه فى العصور الوسطى.
مصادر
Anna Komnene, The Alexiad, Penguin Classics, London 2003
الموسوعة الثقافية ، فرانكلين للطباعة والنشر نيو يورك - القاهرة 1972.
↑ أبالعنوان : Анна Комнена — نشر في: Brockhaus and Efron Encyclopedic Dictionary. Volume Iа, 1890
↑العنوان : Анна — نشر في: Encyclopedic lexicon. Volume II, 1835
