البحر بيضحك ليه

وانا نازله ادلع املا القلل

البحر غضبان ما بيضحكش

اصل الحكاية ما تضحكش

البحر جرحه ما بيدبلش

و جرحنا ولا عمره دبل

البحير بيضحك ليه

وانا نازله أدلع أملي القُلل

مساكين بنضحك من البلوه

زي الديوك و الروح حلوه

سارقاها من السكين حموه

و لسه جوا القلب أمل

و البحر بيضحك ليه ليه ليه

وانا نازله أدلع أملي القُلل

قللنا فخارها قناوي

بتقول حكاوى و غناوى

يا قلة الذل أنا ناوى

ما شرب و لو فى الميه عسل

والبحر بيضحك ليه ليه ليه

وانا نازله ادلع املا القلل

ياما ملينا وملينا

لغيرنا وعطشنا ساقينا

صابرين و بحر ما يروينا

شايلين بدال العله علل

والبحر بيضحك ليه … ليه

وانا نازله ادلع املا القلل

فى بالى ياما و علي بالى

و اللى بيعشق ما يبالى

ما يهمنيش من عزالى

يا حلوه لو مرسالى وصل

و البحر بيضحك ليه ليه

وانا نازله ادلع املا القلل

بيني و بينك سور ورا سور

وانا لا مارد ولا عصفور

فى ايدى عود رنان و جسور

وصبحت انا فى العشق مثل

و البحر بيضحك ليه

و انا نازله ادلع املا القلل