فاروق الباز عالم فلك و چيولوچيه مصرى واخد المواطنه الامريكانى. فاروق الباز من قرية طوخ الاقلام ف السنبلاوين. خد بكالوريوس العلوم تخصص كيميا و جيولوجيا من جامعة عين شمس و سافر امريكا عشان يكمل دراسه و خد الدكتوراه بتاعتو هناك. اشتغل مع وكاله ناسا عشان يساعد ف التخطيط للاستكشاف العلمى لالقمر ف بروجرام ابولو من 1967 ل1972، و كان من الچيولوچيين اللى دورهم كان قيادى ف البروجرام و ف دراسة الچيولوچيه بتاع القمر. فاروق الباز كان م المهمات بتاعتو ف البروجرام اختيار مواقع النزول لبعثات ابولو و تدريب رواد الفضا علا اختيار عينات مناسبه م القمر و يجيبوها عشان التحليل و الدراسه. و شارك مع ناسا ف المؤتمرات الصحفيه اللى كات بتتعمل عن مهمة استكشاف القمر. بشكل عام دور فاروق الباز ف بروجرام ابولو كان بارز و اساسى. رواد الفضا ف بروجرام ابولو كانو بيسموه الكينج.
فاروق الباز دلوقت بروفسير ف و مدير سنتر لاستشعار من بعيد ف جامعة بوسطون، بوسطون، ماساتشوستس.
حياته
فاروق الباز من قرية طوخ الاقلام ف السنبلاوين ف محافظة الدقهليه. عيلتو اتنقلت لالزقازيق ف محافظة الشرقيه و اتولد هناك ف 2 يناير 1938. خد البكالوريوس بتاعو ف العلوم تخصص كيميا و چيولوچيه و هوا عندو 20 سنه ف جامعة عين شمس، و ده كان ف سنة 1958. بعد كده سافر امريكا و خد الماچستير بتاعو ف الچيولوچيه من جامعة ميزورى ف سنة 1961. عمل ابحاث من سنة 1962 لسنة 1963 ف معهد ماشاتشوستس لالتكنولوچيه (MIT) و خد الدكتوراه بتاعتو من جامعة ميزورى لالعلوم و التكنولوچيه ف سنة 1964 و هوا عندو 26 سنه.
شغله
من سنة 1958 ل1961، فاروق الباز درّس الچيولوچيه ف جامعة اسيوط ف مصر. و من 1964 ل1965 درّس الچيولوچيه ف جامعة هايدلبرج ف المانيا.
ف سنة 1966 شارك ف اكتشاف منطقة بترول المورجان ف خليج السويس المصرى. و ف سنة 1978 كان المستشار العلمى لالريس السادات، و خد جايزة ميريت المصريه م الدرجه الاولانيه.
اشتغل مع وكاله ناسا عشان يساعد ف التخطيط للاستكشاف العلمى لالقمر ف بروجرام ابولو من 1967 ل1972. حدد موقع نزول ابولو 11 ف 1969 و شارك ف ابولو 15 ف 1971 اللى هوا حدد موقع نزولها و شارك ف تدريب رواد الفضا ع الملاحظة و التصوير و جمع العينات، و دورو كان بارز و اساسى ف المهمات دى.
ف 1973 ناسا عينتو عشان يشارك ف مهمة ابولو-سويوز التجريبى.
فاروق الباز اسس مركز دراسة الارض و الكواكب ف متحف الطيران و الفضاء الوطنى ف مؤسسه سميثسونيان.
فاروق الباز ليه ابحاث مهمه عن اصول و تطور الصحارى، و استكشاف المايه ف البيئات دى.
من 1982 ل1986 كان نايب مدير سيستم ايتك ف ليكسنجتون ف ماساتشوستس.
ف 1986 انضم لجامعة بوسطون و دلوقت هوا بروفسير ف و مدير سنتر لاستشعار من بعيد فيها. ف مدة شغلو ف العشرين سنه اللى فاتو ف جامعة بوسطن الباز استعمل صور الساتالايت عشان يدرس تطور الصحارى، و قدم دلايل ان تطور الصحارى مش من عمل الانسان و ان سببها تغييرات مناخيه. و اكتشف بردو انهار تحت الصحاره من دراسة صور الرادار.
الباز ليه كتب و مقالات كتير، منهم "ابولو ع القمر" و "الصحرا و الاراضى الجافه" و "الچيولوچيه بتاع مصر" و "فيزيا التصحير" و "لاستشعار من بعيد ف الاركيولوچى" و "ممر التنميه و التعمير: وسيله لتأمين مستقبل الاجيال اللى جايه ف مصر".
الباز ليه حوالى 540 ورقه بحثيه علميه منشوره.
نظريتو عن الاهرامات بتاع الجيزه
الباز ليه نظريه عن الاهرامات بتاع الجيزه بيقول فيها ان المصريين القدام اختارو شكل الاهرامات ب التحديد عشان هما كانو عارفين ان الفورمه بتاع الهرم مبيحصلش تآكل فيها بسهوله. النظريه دى قالها اول مره ف فيلم توثيقى ف ناشيونال چيوجرافيك ف سنة 2002.
جوايز و تكريمات
فاروق الباز واخد تكريمات و جوايز عالميه، من ضمنها:
- جايزة الباب الدهبى من مؤسسة بوسطون الدوليه ف 1991
- جايزة ميريت المصريه م الدرجه الاولانيه، اللى الريس السادات اداهولو
- ميدالية نيڤاده بتاع مؤسسة البحوث بتاع الصحارى
- فى استرويد متسمى ب اسمو، اللى هوا استرويد 7371El-Baz
- جايزة ناسا ف انجازات ابولو
- ميدالية الانجازات العلميه المميزه
- شهادة الميريت العالميه
- جايزة الانجازات العلميه المميزه من المنظمه المصريه-الامريكيه ف 1989
- ف 1989 خد الدكتوراه التكريميه ف العلوم من كلية نيو انجلاند (New England College)
- ف 2003 خد الدكتوراه التكريميه من جامعة المنصوره
- ف 2004 خد الدكتوراه التكريميه من الجامعه الامريكانيه ف القاهره
- ف 2004 بردو خد الدكتوراه التكريميه ف الهندسه من جامعة ميزورى لالعلوم و التكنولوچيه
- خد جايزة الانجاز العلمى و التكنولوچى من ناسا
- المدرسه لابتدائيه بتاعتو اللى درس فيها ف مصر متسميه ب اسمو
الباز اختاروه زميل ف: المؤسسه الامريكانيه لتطوير العلوم، المجتمع الچيولوچى الامريكانى، الاكاديميه العالميه لالعلوم (TWAS)، الاكاديميه الامريكانيه القوميه لالهندسه. الباز كمان عضو ف المركز المصرى لالدراسات لاقتصاديه، و مؤسسة الحفاظ ع الاثار المصريه.
فى جايزه سنويه ب اسم الباز عملتها مؤسسة المجتمع الچيولوچى الامريكانى (GSAF) ف 1999 اسمها جايزة فاروق الباز ف بحوث الصحرا. و ف 2007 نفس المؤسسه عملت جايزه تانيه ب اسم الباز اسمها جايزة فاروق الباز لطلاب البحوث.
الباز ليه انترڤيوهات كتير عن حياتو، منها: "الفلاح فوق القمر"، "النجوم المصريه ف السما"، و غيرهم.
مصادر
