روبيرت الراهب Robert the Monk ( عاش فى فترة الحمله الصليبيه الاولى 1096 ) راهب لاتينى حضر حسب قوله خطبة البابا اوربان التانى اللى اتدشنت فيها الحروب الصليبيه و أرخ للحمله الصليبيه الاولى فى كتابه " هيستوريا ايهروسوليميتانا " Historia iherosolimitana. شخصيته مش معروفه بالظبط لكن فيه احتمال انه كان روبرت رئيس دير سانت ريمى فى فرنسا لكن مش ممكن التأكد من ده .^[1]

بيعتبر كتابه من اهم الكتب اللى اتكتبت عن طريق معاصرين للحمله الصليبيه الاولى ، ذكر فيه نسخه لخطبة للبابا اوربان فى كليرمونت فى اكتوبر 1095 ، و حكى عن الحمله الصليبيه الشعبيه اللى قادها " بطرس الناسك " و الحملات المنظمه اللى راحت القسطنطينيه و منها على اسيا الصغرى و قدرت تستولى على الاراضى المقدسه و القبر المقدس فى بيت المقدس .

استند فى كتابه على " جيستا فرانكوروم " Gesta Francorum ( اعمال الفرنكيين ) ، اللى كتبه شخص مجهول كان فى جيش بوهيموند الاول ، لكن ضاف شوية حاجات. اترجم كتابه من اللاتينى بعنوان " تاريخ الحمله الصليبيه الاولى Robert the Monk's History of the First Crusade و بقى مرجع مهم للمؤرخين و الباحثين.

• Historia Ilherosolimita, trans. Carol Sweetenham, Ashgate Publishing Limited, England 2006