دمنهور (نطقمصرى: /dɑmɑnˈhuːr/; مصرى قديم: Dmỉ-n-Ḥr.w ”قرية حورس“; قبطى: Ⲧⲙⲉⲛϩⲱⲣ; يونانى: Ἑρμοῦ πόλις μικρά) هى مدينه مصريه و عاصمة محافظة البحيرة, فى وسط غرب دلتا النيل على بعد 70 كم جنوب شرق اسكندريه و 160 كم شمال غرب القاهره. كان اسمها فى العصرالرومانى " هيرموبوايتا ". اتعرفت كمان بإسم "دمنهور الوحش".[2] دمنهور عاصمة الاقليم من ايام الفراعنه و فى العصور الوسطى كانت مركز للمواصلات و تجارة القطن و اشتهرت بالاقمشه اللى كانت معروفه بإسم الاقمشه الدمنهورى. دلوقتى فيها محالج للقطن و مصانع لنسج الصوف.
مصر فيها كذا قريه معروفه بإسم دمنهور منها قريه بين القاهره و اسكندريه معروفه بإسم دمنهور وحشى, و منها قريه فى نواحى القاهره معروفه بإسم دمنهور شبرى و دمنهور الشهيد, و فيه قريه رابعه اسمها برضه دمنهور فى محافظة اسيوط بين منفلوط و بنى شقير .[3]
فى وقت الحمله الفرنسيه على مصر ( 1798-1801 ) حصلت فى المدينه و نواحيها معارك بين المصريين و الفرنساويه انهزم فى معظمها الفرانسويه و اتكبدو خساير كبيره, و حصلت فيها معارك تانيه بين قوات محمد على باشا و قوات الألفى بك .[4]
اصل الاسم
فى العصر البطلمى كان اسمها "هرموپوليس بارڤا" (Hermopolis Mikra, Ἑρμοῦ πόλις μικρά), و اتسمت كمان "تيم انهود" فى كتب تاريخيه [2] و فى العصرالرومانى اتسمت هيرموبوليتا. و اسم مدينة دمنهور اسم مصرى قديم جه من (دما.ن.هور) يعنى مدينة حورس و هو نفس معنى اسم هرموپوليس, و كانت بتشتهر ايام الفراعنة بكترة المعابد الفرعونيه, و بالذات معبد كبير للإله حورس.
