جمال الدين الشيال ( دمياط ، 27 يونيه 1911 - اسكندرية ، 2 نوفمبر 1967 ) مؤرخ مصرى و استاذ كبير مشهور فى التاريخ الاسلامي. إتخرج من جامعة القاهرة سنة 1936 ، و أخد الدكتوراه فى التاريخ من جامعة اسكندريه سنة 1947 بتفوق. كرمته مصر و أخد جوايز تقديريه كتيره من الدوله منها جايزة الدوله التشجيعيه فى التاريخ. إشتغل محاضر فى معاهد و كليات مختلفه و إشتغل ملحق ثقافى لمصر فى الخارج.
حقق كتب تاريخيه مهمة منها كتاب المقريزى " إغاثة الامه بكشف الغمة ، و الجزء الاول من كتاب المقريزى اتعاظ الحنفا بأخبار الائمة الفاطميين الخلفا ، و كتاب ابن واصل " مفرج الكروب فى تاريخ بنى أيوب " و له مؤلفات قيمه فى التاريخ زى " تاريخ مصر الاسلامية " ( جزئين ) اللى كتب فيه عن تاريخ مصر فى العصور المختلفه و صحح فيه غلطات للكتاب و المؤرخين المعاصرين. بوفاة جمال الدين الشيال و هو عنده 56 سنه مصر ضاع منها مؤرخ فذ مااتعوضش فيها.
كتاب " اتعاظ الحنفا بأخبار الائمة الفاطميين الخلفا " لغاية اربعينات القرن العشرين ما كانش معروف منه غير نسخه مخطوطه ناقصه فى مكتبة توبنجن فى المانيا ، و نشر عنها المستشرق الالمانى بونز كتاب سنة 1909 ( طبعة دار الأيتام فى القدس ) و اثبت إن المخطوطه اتكتبت بخط المقريزى نفسه. جمال الدين الشيال نشر النص فى القاهره سنة 1948 بعد ما صححه بشكل علمى. بعد كده اكتشف المؤرخ و المستشرق كلاود كاهين Claude Cahen ان فيه نسخه كامله من الكتاب موجوده فى مكتبة احمد التالت فى استانبول ، و بين جمال الدين الشيال ان الكتاب الاولانى ما كانش اكتر من سدس الكتاب الكامل و قدر يجيب النص الكامل و نشر المجلد الاول فى القاهره سنة 1967 لكن اتوفى و كمل الموضوع محمد حلمى احمد و نشر مجلدين تانيين فى القاهره سنة 1971 و 1973 .[2]
من مؤلفاته
الاسكندرية، طوبوغرافية المدينة و تطورها من اقدم العصور الى الوقت الحاضر (1952).
دراسات فى التاريخ الاسلامى (1966).
أعلام الاسكندرية (1965).
مجمل تاريخ دمياط (1949).
الوثائق الفاطمية (1956).
تاريخ مصر الاسلامية (1966).
مصادر
↑مُعرِّف النظام الجامعي للتوثيق (IdRef): https://www.idref.fr/076303446 — تاريخ الاطلاع: 7 مارس 2020 — العنوان : Identifiants et Référentiels — الناشر: وكالة الفهرسة للتعليم العالي
