المملكة الوسطانية او الدوله الوسطى ، مصطلح بيقصد بيه العلما بتوع المصرولوجيا الفترة اللى امتدت من سنة 2040 -1640 (ق ع ح ) و اللى حكم فيها مصر ملوك الاسرة الحد-اشر و لحد نهاية الاسرة الاربع-ت-اشر.
العاصمه
الاسره الحداشر حكمت مصر من مدينة طيبه (الاقصر ) بس من بداية الاسره الاتناشر اتنقلت العاصمه فى الجيزه بالتحديد فى مدينه إجتاوى اول بعض المصادر تسميها اثيت تاوى هيا الايام دى تسمى اللشت واللى معناها فى المصريه القديمه القابضه على الأرضين (الشمال و الجنوب)
الملوك
من اشهر ملوك الفترة دى هو منتوحوتب التانى اللى قدر يوحد مصر كلها مرة تانبة بعد فترة التسيب و الانحلال اللى مرت بيها مصر بعد انهيار المملكة القديمة.فراعنة المملكة الوسطانية حاولوا يرجعو هيبة مصر عن طريق حملات التاديب اللى شنوها على النوبه و ليبيا و الاسيويين فى فلسطين ومن اشهر ملوك الحملات دى هو سنوسرت التالت
الانجازات
من اجمل الحاجات اللى سابها فراعنة المملكة الوسطانية هى البرديات ( بردية برلين ، بردية موسكو ، بريدية ريند، بردية ادوين سميث ، بردية ايبيرس). اهمية البرديات دى بترجع للمعلومات الكتيرة المكتوبة فيها و اللى بتدينا صورة عن الرياضيات و الهندسة و الطب و الجراحة فى مصر القديمة.و من اهم الانجازات اللى اتحققت فى الفترة دى هى حفر قناة بيتوصل بين البحر الاحمر و النيل (و البحر المتوسط) و اللى عمل الانجاز العظيم دا هو الفرعون سنوسرت التالت.
النهايه
انتهت المملكة الوسطانية بحالة انهيار اجتماعى و اقتصادى و وقوع مصر لاول مرة تحت الاحتلال الاجنبى الجاى من اسيا(الهيكسوس).و اللى حكمو مصر و كونوا الاسرتين الخمس-ت-اشر و الست-ت-اشر.
