الله من عمرٍ تداعت تواليه
ظلت لواليسه وفاتت طراته
جرحي عميق وبالغاتٍ مساطيه
كني صويب القلب قربت حراته
لو ان ما يطري على البال يبديه
كان استرحت وقلت: ياقلب هاته
أبديت ما تبدي على الله مشاكيه
وفرجت عن قلبٍ عبث به سكانه
أبديت ما ظليت وقتي مخفيه
يلوج بلساني، وضاقت لهاته
أبديت ما يبرد على القلب صاليه
وجمعت به شمل تزايد شتاته
وين الرفيق اللي نوده ونغليه
نغليه لو يعرض بتالي حياته
والله لو تكثر علينا مواذيه
حلفت بالله ما نسوي سواته
إلا ومع هذا عسى الله يجازيه
عني بخيرٍ بالحياة ومماته
أنا رفيقي لو غلط ما أقدر أجزيه
إلا بصفح وعفةٍ عن شنانه
اترك له التالي على شان ماضيه
وافرح بخيره واهتني من هناته
واعرض عن ازعاجه ولا نيب شانيه
تعادلت بي سيته وحسناته
ولا ني مبيح به ولا نيب شانيه
أشيلها في جانبي عن شماته
إن طالت الدنيا، زمانه يربيه
وتبدي له الأيام ما أخفت وفاته
هذا برايي، والرجال المنابيه
تاريخهم رسمٍ يقدي سراته
تاريخهم رسمٍ طويل مراقيه
زينه تزين به وعدل لواته
عدل بنفسك ما ادركوا واخفقوا فيه
وعلى الله إظهار الدلي من صراته
واجهت ميلات الدهر مع ضواريه
وعانيت ماعانوا بروس شرفاته
وادركت ما يدرك وظليت اساريه
وعرفت من وقتي كثير عرجاته
واضمرت أهيض من ضميري خوافيه
وعساي أصيب الصوب عن مايلاته
الله يعاوني على ما أرغب أفضيه
ولعل منطوقي يحقق مناته
