- Iste articlo tracta sobre o tozal de Pelopín. ta atros emplegos de Pelopín se veiga Pelopín (desambigación).
O tozal de Pelopín, punta Pilopín[1] u simplament Pelopín ye a segunda altura d'a sierra d'a Manchoya con 2007 metros d'altitut,[2] en as sierras interiors pirenencas d'Aragón, en o que en l'actualidat ye a comarca de Sobrarbe.
O Pelopín ye a punta mas septentrional d'a sierra d'a Manchoya y ye una punta vistera ta tres valles: a valle de Broto por o costau oriental, a valle d'o río Sorrosal por a man norte, y a valle d'Otal por a ueste. Ye una d'as fitas que sinyorean o Sobrepuerto, por a part d'Otal, y entre a suya baixant nor-ueste y a dita Penya Ronata se troba o cuello Otal, o puerto tradicional ta pasar entre Otal y a cuenca d'o río Sorrosal. Por a versant sud se pasaba dende Sobrepuerto t'a valle de Broto por Yosa, por o puerto dito cuello Pelopín.
Toponimia
Chesús Vázquez Obrador, en o suyo treballo sobre a toponimia d'o Sobrepuerto (Comarca de l'Alto Galligo, 2004), afirma que Pelopín ye probablement un toponimo composato.[3]
O primer etimo estaría una contracción de <PŌDIU, «pueyo» (tozal), en una forma monosilaba que se troba a sobén en a toponimia altoaragonesa.[3] Seguntes iste mesmo autor, a segunda parte d'o toponimo, -lopín, correspondería con a evolución d'un chenitivo latín <*LŪPINI, derivato de l'antroponimo (nombre de persona) <LŪPINU.[3] En iste caso, Pelopín significaría «tozal de Lūpinu».
Manimenos, o propio autor reconoix a posibilidat de que o dito «Lupinu» no estás en realidat un nombre de persona, sino un adchectivo referent a o lobo, <LUPU en latín, de forma que o significato etimolochico alavez estaría «tozal d'os lobos».[3]
Referencias
Se veiga tamién
Vinclos externos
.png)
