Lo río de Calanda (río Guadalopillo en castellano) ye un afluent de lo río Guadalop por la marguin ezquierda.
Naixe baixo lo puerto de Majalinos a lo norte de la sierra d'Exulve (que bel autor incluye en la sierra de Sant Chust).
Traviesa superficies calsinosas a lo nord-este d'Exulve y recibe barrancos que baixan dende las versants occidentals y septentrionals de la sierra de Caballos.
Localidaz por a on que pasa, por lo menos por o suyo termin son: Exulve, Molins, Berche, Alcorisa, Foz Calanda y Calanda.
Toponimia
Lo hidronimo río de Calanda fa referencia a la localidat a on que caye en Guadalop y con mayor identidat historica que las atras de la suya cuenca.
En textos relacionaus con las comandas aragonesas de la Orden de Calatrava escritos en latín medieval se nombra como rivum de Molinos:
...profequitur Barranchum usque ad Campum de Vivas, ubi funt olivæ , & cadit in
rivum de Molinos, deinde venit per podium, quod dicitur Cabeza de los Dentales,...
[1]Cheronimo Zurita fa mención de la suya en los "Anales de la Corona de Aragón":
...Y se ganó
Caspe, lugar muy principal junto a las riberas de Ebro. Y de allí se continuó la guerra por las
riberas de Guadalob y del río de Calanda...
Lo cartografo y astronomo portugués Labanha fa mención de lo río de Calanda en lo suyo "Itinerario del Reyno de Aragón (1610-1611)":
...está arrimada a huās Penhas da
Serra de Calanda, que lhe fica a parte do meyo dia, passa por
Alcoriza o
Rio de Calanda md. que rega seus campos...
[2]En castellano actual s'ha cheneralizau la denominación sufixada con -illo que lo fa derivar de Guadalop como diminutivo toponimico (río Guadalopillo), sin que s'haiga puesto documentar esta denominación antes de lo sieglo XIX, cuan bel cheografo u cheologo encara escribiba río Calanda o Guadalopillo.[3]
Cheomorfolochía
En bel tramo ye paralelo a sierras como la de Caballos, travesando las depresions que bi ha entre ellas, en lo suyo orichen cuencas marguinals. Entalla la roca fendo una foz en los monts a lo sud de Calanda (Foz Calanda).
Aproveitamientos
Bi ha un entibo con nombre aragonés (de Gallipuent), que regula las escasas auguas. En la depresión d'Alcorisa riega una ribera a on que se cultiva lo presco. Tamién se riega con augua de lo río de Calanda en Foz Calanda y en bel regano de lo sudueste de lo termin municipal de Calanda.
Referencias
_(13986027539).jpg)
