Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
O coscollo u coscollera[1] (Quercus coccifera (L., 1758)) ye un arbusto de fuella perenne, verda toda l'anyada, que no s'alza si que bel par de metros d'altaria (muit pocas vegadas plega enta o porte arborio). Gosa estar ramificau dende la base suya, fendo que as brancas, de berla grisa u blanca, s'entaranan deixando l'interior d'o matullo cuasi impenetrable.
As suyas fuellas son simples, alternas, membranosas y tiercas, sin de pilosidaz en garra cara. As marguins foliars son ondeyadas con punchas mas u menos numerosas. A coloración ye verda intensa, y tienen forma agüebada u alargada, con a superficie brilant y lustrosa.
Fuellas d'a Coscolla
As flors están, como en tot o chenero Quercus, separadas por sexos. As flors masclo son chicolonas, con l'embolique fendo forma de copa, trestallada en 4, 5 u mesmo 6 dients y con un numero variau d'estambres (entre 4 y 10). Forman grupos en forma d'espiga curta, de color amarellisca, finetas y penchadas d'as brancas.
As flors fembra libran d'a mesma planta, pero nomás cuan as masculinas son ya xutas (ta evitar l'autofecundación). Anisoladas u en grupos de dos u tres, a fecundación ye eolofila.
O fruito d'ista planta ye de tipo glan y se diz coscollina u coscollín, encara que tamién se diz en bels puestos bellota borde u simplament bellota/billota. No contién que un embrión. Son dicotiledonias, y os cotiledons pueden separar-se lonchitudinalment cuan a coscollina ye ubierta. Una caracteristica d'istas billotas ye que no s'emplegan ta garra bestiar, porque o suyo gusto ye muit amargo y os animals las deixan estar.
