Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
O chacimiento se divide en dos zonas bien diferenciadas: d'una man o recinto fortificau que se troba en l'extremo sudeste d'o cerro y d'atra un recinto extramuros que s'estendilla dica as primeras costeras d'o cabezo Calapetre, con una superficie total de dica 1,7 hectarias. A fortificación aproveita as condicions naturals d'o terreno pa protecher-se, con un cinglo por un canto y un unico acceso con un gran foso de 25 x 7 metros, una doble ringlera de murallas (a primera d'ellas de 4 metros d'amplaria), un camín de ronda y cuantos torretons de planta cercular d'os que encara se conserva un de mas de 13 m d'altaria. O papel d'iste conchunto fortificau ye militar, o control d'accesos y vías de comunicación y a protección d'atros nuclios ibers amanaus y adedicados posiblement a actividaz agropecuarias.
Chunto a o foso yera una primera linia de muralla, feita con grans piedras, con trazau curvilinio de 4 metros d'amplaria rodiau por un camín de ronda. O muro remata en arribar a la costera chunto a o barranco nord-este. Dimpués d'a primera muralla bi ha un espacio libre de construccions en a que nomás bi ha un atro torretón que heba de tener un important papel en a esfensa d'o poblau.
A segunda linia de muralla ye mas complexa debiu a la existencia obras de refuerce, asinas como por una serie de construccions como es un trampo de muralla mas antigo que ye en una fuerte ripa, sobre o que s'adosa un muro de piedra mas regular y de mayor grandaria, con una torre cuadrada d'anglos contreitos. En l'extremo Este d'a muralla bi ha una segunda torre franca de planta cercular, que completa iste recinto.
Bi ha un atra torre esfensiva en a parti central d'a fortificación. Ista torre ye de forma rectangular, con os angulos exteriors contreitos, redondiaus por meyo d'a talla d'os bloques, pa obtener mayor resistencia a os proyectils y suprimir anglos muertos en o tiro y a cosirada.
Seguntes o Boletín Oficial d'Aragón d'o día 18 de chulio de 2001 por o Decreto 134/2001, de 3 de chulio, d'o Gubierno d'Aragón, se declaró a o poblau de Sant Per como Bien d'Intrés Cultural en a categoría de Conchunto d'Interés Cultural, zona arqueolochica.
