O País Valenciano u Comunidat Valenciana (País Valencià u oficialment Comunitat Valenciana en valenciano; País Valenciano u Comunidad Valenciana en castellano) ye una comunidat autonoma d'Espanya situata en l'este d'a Peninsula Iberica. O suyo territorio, d'o que fan parte as provincias de Alicant, Castellón, y Valencia, ye o de l'antigo Reino de Valencia, que fue abolito en 1707 con os Decretos de Nueva Planta.
Mugas
Muga a lo norte con Catalunya y Aragón, a l'ueste con Castiella-La Mancha y con Aragón tamién, y a lo sud con a Rechión de Murcia.
Gubierno y administración autonomicos
O conchunto d'as institucions d'autogubierno d'a Comunidat Valenciana constituye a Cheneralidat Valenciana (Generalitat Valenciana en valenciano). Fan parte d'a Cheneralidat: as Corz Valencianas u Corts, o President y o Gubierno valenciano u Consell.
O president d'a Cheneralidat ye tamién o president d'o Gubierno valenciano.
A potestat lechislativa drento d'a Comunidat, en materias d'a suya competencia, corresponde a las Corz Valencianas, que representan a o pueblo valenciano a traviés d'os suyos 99 parlamentarios.
Historia
Enantes d'o trestallamiento en taifas las cronicas musulmanas en charran como o balad Balansiyya u districto d'a ciudat de Valencia.
Os orichens d'o País Valenciano como lo conoixemos se remontan a lo historico Reino de Valencia que yera drentro de la Corona d'Aragón y lo creyó Chaime I en o sieglo XIII en o contexto d'a conquista d'os reinos de taifas islamicos de Valencia, Denya, y parti de Murcia, y posterior colonización feudal a mans de catalans y aragoneses que trayeban tamién atros cristianos d'atras tierras.
Lo reino creyato por Chaime I desaparixió en lo legal en 1707 por os Decretos de Nueva Planta d'o rei Felipe V d'Espanya. En os zaguers anyos d'o sieglo XIX i habió movimientos cantonalistas, (o d'Alcoi), como en atras zonas d'Espanya (Cartachena). Tamién naixioron reivindicacions rechionalistas y mesmo nacionalistas de signo catalanista que continoron en lo sieglo XX, que creyoron en bels sectors una reacción de signo contrario que encara existe.
En 1982 consiguió un Estatuto d'Autonomía que ha estau reformato en 2006.
Se veiga tamién
Referencias