Oskar Matute García de Jalón (Barakaldo, 5 d'octubre de 1972) ye un politico basco, portavoz d'Alternatiba dende 2009. Actual portavoz adchunto d'Euskal Herria Bildu en o Congreso d'os Deputaus, a on exerce de deputau por Bizcaya dende 2016, tamién estió deputau en o Parlamento Basco por Ezker Batua-Berdeak entre 2002 y 2009, escanyo que tornó a ocupar entre 2012 y 2016 por Euskal Herria Bildu.
Biografía
Diplomau en empresarials por a Universidat d'o País Basco, Matute s'inició en l'activismo social a traviés d'os movimientos d'insubmisión a o servicio militar y o movimiento pacifista Elkarri.[1] Amás ye miembro d'a Fundación Viento Sur, a Fundación Gogoa y Comisiones Obreras.
Estió coordinador d'a Presidencia d'Ezker Batua-Berdeak y d'a Presidencia Federal d'Izquierda Unida, y ha estau miembro d'o Parlamento Basco en as VII y VIII lechislaturas. En as dos exerció como vicepresident d'a Comisión d'Ordenación Territorial, Transportes y Medio Ambient; en a VIII, ocupó amás o cargo de President d'a Comisión de Control Parlamentario d'Euskal Irrati Telebista.
S'incorporó a la dirección d'Ezker Batua en representación d'o colectivo Ekaitza, surchiu en 1993 como una corrient interna partidaria d'o sobiranismo basco, o dreito d'autodeterminación, os movimientos socials alternativos y a participación ciudadana en as decisions politicas. A radíz d'a participación d'Ezker Batua en o Pacto d'Estella de 1998, a corriente Ekaitza se transformó en Batzen, d'a que tamién estió portavoz.[2] Ta par d'alavez, Matute tamién yera miembro d'Espacio Alternativo adintro d'Izquierda Unida.[3]
En 2008 encabezó a unica candidatura alternativa en a VII Asambleya d'Ezker Batua y que fue refirmada por os sectors criticos Batzen y Encuentro Plural Alternativo;[4] pero l'Euskadiko Partidu Komunista, que dica alavez s'heba amostrau discrepant con a dirección, optó por refirmar a candidatura prencipal, con lo que finalment se ratificó atra vegada a Javier Madrazo como coordinador cheneral, cargo d'o que dimitió debant d'os malos resultaus electorals que obtenió a suya formación en as eleccions a o Parlamento Basco de 2009.
Paralelament fació parti d'a fundación d'Alternatiba Eraikitzen ('construyindo l'alternativa', en basco), inicialment una organización sociopolitica que miraba de refundar a ezquierda vasca y que se constituyió en partiu politico con o nombre d'Alternatiba, albandonando definitivament Ezker Batua, en abril de 2009. Alternatiba, que se define como un partiu sobiranista y d'ezquierdas,[5] en 2011 s'integró en a coalición electoral Bildu chunto con Eusko Alkartasuna y independients d'a ezquierda abertzale.[6] En as eleccions municipals de 2011 Oskar Matute zarró a lista de Bildu en Barakaldo.
En as eleccions a o Parlamento Basco de 2012 resultó eslechiu como integrant d'a lista d'a coalición Euskal Herria Bildu (EH Bildu) por a circumscripción de Bizcaya.[7] En as eleccions de 2016 encabezó a lista d'EH Bildu a o Congreso por Bizcaya, resultando eslechiu deputau, por lo que fue substituyiu en o Parlamento Basco por l'avogada Jone Goirizelaia.[8] Dende alavez ha repetiu escanyo en as siguients eleccions.
Referencias
Vinclos externos
.svg){kind=small}
