Las Barracas de los Chaqueses (Venta de la Jaquesa actualment en castellano) ye un despoblau de lo termin municipal d'Albentosa, en la comarca de Gúdar-Chabalambre y en la provincia de Teruel.
Toponimia
En lo sieglo XVI ya s'escribiba La Iaquesa en textos locals en castellano. Por eixemplo La Iaquesa figura como una de las aldeyas dependients de Teruel en la compilación de lo Fuero de Teruel que Gil de Luna publicó en 1565.[1] Actualment lo parache a on quedan las antigas edificacions ye conoixiu como La Jaquesa[2] u Venta de la Jaquesa.
Cheografía
Las Barracas de los Chaqueses ye en la cantonada sudeste de lo termin d'Albentosa, a mitat camín entre Fuent d'el Cepo y Sant Agostín, chusto a cantos de la muga municipal entre lo termin d'esta zaguera localidat y lo d'Albentosa y a poco mes de 2 km de la muga con una francha de lo termin municipal de Lo Toro (Castellón) que lo desepara de Barracas, tamién en la Provincia de Castellón.
L'actual partida dita La Jaquesa a on se troba lo despoblau ye travesada por la carretera que comunica Teruel con Murviedro. Tamién ye travesada por dos vías lo ferrocarril, y ye un poquet a lo sud de la Estación de Mora de Rubielos. Estas tres vías de comunicación trescruzan lo barranco de la Jaquesa u Rambla de la Jaquesa, curso temporal d'augua de la compleganza de lo río Barruezo, afluent de lo río Millars.
Historia
Lo 18 de febrero de 1360 se menciona como Jaccensis en un texto en latín sobre impuestos que s'heba de fer pagar por lo bestiar que saliba d'Aragón y entraba en lo Reino de Valencia:
...et aliis animalibus descendentibus de regno Aragonum vel aliunde transitum facientibus per terminos
castri del Poyo, sed etiam ab aliis omnibus ganatis et peccoribus et animalibus que transitum facient causa exivernandi vel intrantium in regno vel ad regnum Valencie, per terminos sive passus de
Andilla, de
Bexix, de
Vistabella, de
Barrachiis,
Jaccensis, et alios terminos et passus quoscumque per quos possunt aut solitum est dicta ganata Aragonum vel aliunde ad dictum regnum Valentie dicta de vel alia per transire...
En lo sieglo XV fació part de la Sobrecullida de Mont-Albán.[3] Estió una duana important a on se controlaba la entrada y salida de mercaderías y bestiar entre los reinos d'Aragón y Valencia. Se conserva tres manuscritos de l'actividat d'esta duana en las anyadas de 1444-1445, 1445-1446 y 1446-1447, textos que muestran la terminolochía en aragonés de productos que lo reino no produciba y que heba d'importar dende atras tierras,[4] por eixemplo peixes de la mar Mediterrania. Estió tamién un punto d'introducción de productos exoticos de tierras de bien luent entre los que claman l'atención las mencions a turquesas y plumas, ventallos y uegos d'estrucio.[4]
Referencias
- ↑ (es) Edición facsímil de FORI TVROLII. Los Fueros de Teruel. Edición de Gil de Luna, 1565. Teruel 1998. Ayuntamiento de Teruel, El Justicia de Aragón, Instituto de Estudios Turolenses.
- ↑ (es) Antonio Ubieto Arteta Historia de Aragón. Los Pueblos y los despoblados, II. Anubar ediciones 1986 pp 789.
- ↑ (es) Antonio Ubieto Arteta Historia de Aragón. Los Pueblos y los despoblados, I. Anubar ediciones 1986 pp 215.
- ↑ 4,0 4,1 (es) LÍBANO, Ángeles y SESMA, J. Ángel, Léxico comercial en Aragón (Siglo XV) Institución Fernando el Católico, 1982.
Bibliografía
- Concepción Villanueva Morte La trashumancia y los herbajes de ganado a través de la aduana de Barracas a mediados del siglo XV publicau en lo libro La trashumancia en la España mediterránea : historia, antropología, medio natural, desarrollo rural, 2004, ISBN 84-87333-74-5 , pachinas 203-232.
.jpg)
.svg){kind=small}
