Juan Antonio de Andrés Rodríguez (Teruel, 1942) ye un avogau y politico aragonés que estió president d'a Deputación Cheneral d'Aragón.
Biografía
Naixiu en 1942 de Teruel, ye licenciau en Dreito. Estió consellero de Treballo y Servicios Socials y Sanidat, Treballo y Acción Social en os dos respectivos gubiernos de Gaspar Castellano. En dimitir o president dimpués d'a redota d'UCD en as eleccions chenerals de 1982, Juan Antonio de Andrés, d'o mesmo partiu, prene o control d'o gubierno, succedendo a José María Hernández de la Torre que heba estau president en funcions.[1]. En a suya etapa reorganiza l'anterior executivo metendo a consellers más politicos: José Ángel Biel como consellero de Presidencia; Luis Alfonso de Miguel, d'Agricultura; Vicente Comet, de Sanidat, y Francisco Seral, de Treballo y Acción Social.
Como president, entre febrero y abril de 1983 fació una campanya institucional con l'obchectivo de dar a conoixer o nuevo Estatuto d'Autonomía d'Aragón d'a que feban parti politicos, intelectuals, artistas y representants d'atras institucions. Tamién se celebró o 23 d'abril d'ixe anyo en Fraga una chornada d'afirmación aragonesista.
Entre as suyas reivindicacions a o Gubierno d'o Estau estioron as milloras en as comunicacions, presentando-se os prochectos de l'Autovía Zaragoza-Madrit y l'exe norte-sud en forma d'una autovía que uniría Pau, Uesca, Zaragoza, Teruel y Valencia. Como a mayoría d'executivos aragoneses reivindicó tamién a reubertura d'o Canfranc. En ista lechislatura se celebró en Bordeus a Conferencia d'os Pireneus.
Dimpués d'albandonar a presidencia estió Director Cheneral d'Afers Churidicos y Administración Autonomica en o gubierno d'Emilio Eiroa. D'atra man también lideró en Aragón a frustrada «Operación Reformista» de Roca, fendo parti d'a suya chestora chunto a Vicente Bielza de Ory, Luis María Garriga Ortiz y José Antonio Armillas.
Ha estau tamién Chefe d'Inspección d'a Seguridat Social en Uesca.
Referencias
Se veiga tamién
Vinclos externos
.svg){kind=small}
