A ilesia de l'Asumpción de Nuestra Sinyora de Quinto (Ribera Baixa d'Ebro, Aragón) ye una ilesia construita, sobre o vago de l'antigo castiello d'a localidat, entre os sieglos XIV y XVIII en fases succesivas. O suyo disenyo s'atribuye a Mahoma Rami, arquitecto de Benedet XIII.
Tiene fabrica mudéchar de ladriello, fueras d'o zoclo d'a torre, que ye de piedra y probablement perteneixería a la construcción anterior.
Consta de nau de cuatre trampos, cubierta con vueltas de crucería, con capiellas entre os contrafuertes y cabecera poligonal con chicotas capiellas radials, correspondients a una ampliación d'o XVI, igual que o recreiximiento d'os muros por dencima d'as vueltas en forma de galería d'arquiellos de meyo punto doblaus.
D'atra man, os dos zaguers trampos d'a nau y as suyas capiellas laterals son fruito de reformas feitas en o XVII, asinas como a simpla frontera barroca coronada por un frontón triangular, mientres que a capiella de Santa Ana, ubierta en o costau norte, fue construita en o XVIII, formando un volumen prou diferenciau d'a resta d'o conchunto debiu a o suyo cubrimiento con vuelta.
En o costau sud se devanta a devantdita torre de cuatre cuerpos, prou decorada con motivos tipicos de l'arte mudéchar (esquiniellas, lazos...). O cuarto cuerpo, ya d'o XVI, ye rematau por almenas y un chapistel.
A iluminación de l'interior se reyaliza a traviés de grans finestrals apuntaus y zarraus orichinalment por tracerías goticas, hue cuasi perdidas, y tamién a traviés d'una tribuna que recorre os dos primers trampos d'a nau y parti de l'abside.
O espacio interior ye amplo y diafano, debiu a la gran altaria y amplaria d'a nau gotica, y sería, en orichen, decorau con esgrafiaus y agramilaus sobre o enlucido.
Se veiga tamién
