A ilesia de Sant Miguel d'os Navarros ye una ilesia que se troba en Zaragoza (Aragón).[1] Ye una ilesia d'estilo mudéchar-barroco construyida en o sieglo XIV. Tien una sola nau, tres trampos, un abside y a suya famosa torre. A tamas d'haber estau reformada, o suyo aspecto no ha cambiau guaire. Tien amás un túnel repleto de celdas que sale d'a ilesia en dirección a las Tenerías, y que plega dica l'Ebro. Iste túnel se remonta a un convento anterior a la ilesia, y prencipia en una chicota puerta en o soterranyo d'a ilesia. Entre os cofadres le'n conoixe como "a cripta".
O frontispicio, d'estilo barroco, poseye una elegancia sobria dotada por o ladriello con que se construyió. O coro ye un atra muestra de l'arte barroco en ista ilesia.
Damián Forment, reconoixiu escultor renacentista, esculpió o finismo retablo mayor d'a ilesia, feito en fusta policromada. Destaca una pintura a o temple sobre os laterals labraus con lacerías mudéchars.
En a portalada se troba una escultura d'o santo titular d'ista iglesia, Sant Miguel Arcánchel, reyalizada por Antonio Palao, vencendo a o demonio. D'estilo barroco, l'alocha una capilleta en o remate d'a portalada.
En ista ilesia estió emblematica a dita Campana d'os Perdius, cuala tradición se mantiene en l'actualidat.
Bibliografía
100 motivos para enseñar tu ciudad. Conoce la Zaragoza monumental folleto editado por el Ayuntamiento de Zaragoza
Fatás, Guillermo, (coord.) Guía histórico-artística de Zaragoza, Zaragoza, Ayuntamiento (Servicio de acción cultural), 19913. ISBN 84-86807-76-X.
