A ilesia de Nuestra Sinyora de l'Asumpción (en italiano Chiesa dell'Assunzione della Beata Vergine Maria) ye una ilesia catolica construyida en o sieglo XVIII en estilo barroco que se troba en a localidat de Caselle Landi (Lombardía, Italia),[1] adedicada a l'Asumpción de Nuestra Sinyora. Dende lo punto d'anvista d'a Ilesia Catolica pende d'o vicariato de Codogno en a diocesi de Lodi y archidiocesi de Milán.
Descripción
Se tracta d'una iglesia con rectagular con nomás que una sola nau con abside semicircular. L'edificio ha estau obchecto de cuantas restauracions y remodelacions, incluyida la zaguera dimpués d'a inundación provocada por o río Po en 1951 que atramalló toda la redolada d'o Baixo Lodi.[2] O suyo campanal d'antes mas se trobaba dezaga de l'abside, pero cuan s'esvielló lo templo en 1891 se i debantó uno nuevo, que se troba deseparau d'a ilesia por una capiella adedicada a Nuestra Sinyora de Lorda.
En dentrar-ie, a la man ezquierda se troba lo baptisterio, con una covilleta adedicada a la Natividat de Santa María y una capiella adedicada a sant Antón de Padua, y a la man dreita un fresco adedicau a santa Francesca Saverio Cabrini, obra de Luigi Arzuffi y que amuestra a la santa en o suyo viache enta America, y una atra capiella adedicada a Nuestra Sinyora d'o Rosario. Contina la succesión de capiellas laterals con atras adedicadas a sant Chusé, sant Sabino (santo patrón d'o lugar), o Sagrau Corazón de Chesús y Nuestra Sinyora d'os Dolors.
En a nau central se i troban tamién frescos obra de Paolo Zambelli amostrando los cuatre evanchelistas ("tetramorfos"), a bels atros santos, a la Dormición de Nuestra Sinyora y a sant Sabino, presidindo iste zaguero lo conchunto dende l'alto con a suya función de protector d'o lugar como santo patrón que en ye.
Galería d'imáchens
Referencias
Vinclos externos
