Construyida entre zaguerías d'o sieglo XVI y primerías d'o XVII en estilo gotico tardano, a suya portalada de l'anyo 1610 preanuncia o barroco. Feita por o mayestro d'obras Chuan de Torón, autor chunto a Antonio Torón, d'atras grans construccions d'o Semontano como as ilesias de Nabal (1580), Colungo, Guardia (1585) y Sobrarbe como a ilesia de Santa Olaria d'o Elsón.
Descripción
Torre
Ye un edificio de nau unica con capiellas laterals y cabecera poligonal. Feito en sillería, a suya portalada s'ubre a os suyos piez con un arco de meyo punto doblau sobre columnas que son flanquiadas por atras dos columnas que sirven pa refirmar l'entablamento. A decoración en relieu, distribuyida por columnas, exutas y roscas d'os arcos ye profusa. Dencima de l'entablamento i hai un atro cuerpo rematau por un frontón en que s'incluye una capilleta.
Sobre a nau i ha en l'exterior una galería d'arquiellos de meyo punto feita en ladriello. As finestras que s'ubren en l'abside son en arco apuntau. Una caracteristica sinyalera d'ista ilesia ye a suya torre, que ye exempta, alacetada sobre una penya de piedra d'arena y se i accede a traviés d'un trampo d'escaleras entretalladas en a propia roca. Se divide en tres cuerpos, uno cuadrangular y dos octogonals deseparaus entre sí por imposta. En o trampo inferior i hai garitons en as esquinas que d'antis mas s'emplegaban pa esconchurar tronadas, pestes y atros periglos pa os cautivos. En o superior s'ubren en cada cara de l'octogono vanos de meyo punto pa as campanas.
