A ilesia d'o Salvador de Morillo de Galligo ye una ilesia d'estilo romanico aragonesa que se troba en a localidat de Morillo de Galligo, en a comarca d'a Plana de Uesca y provincia de Zaragoza. Dende lo punto d'anvista d'a suya adscripción administrativa en a Ilesia Catolica, pende de l'arcipestrau d'Erla-Uncastiello en a diocesi de Chaca y de l'archidiocesi de Pamplona y Tudela.
Ye una ilesia consagrada en 1110[1] y adedicada a lo Salvador.
Historia
A iglesia se construyó mientres a existencia d'o clamau Reino d'os Mallos en o reinau de Berta d'Aragón, qui l'heba recibiu como dote en herencio de Pero I d'Aragón, y se consagró en l'anyo 1110.[1] Tanimientres, d'ista primera ilesia nomás se conserva que la suya cripta, los suyos absides y la suya torre. D'a segunda metat d'o sieglo XII se conservan a cobertura d'o crucero con vuelta de crucería, y ya en o sieglo XVI se construyoron as naus y la sagristía.
Descripción
En trobar-se en un terreno con deslivels, en a suya construcción s'emplegoron solucions similars a las emplegadas en templos con a misma disposición orografica, como ye lo caso de Sant Istevan de Sos d'o Rei Catolico, en construyindo una cripta en o suyo livel mas inferior y dencima d'ella, la ilesia; ilesia y cripta comparten a suya cabecera en os suyos respectivos absides que exteriorment se presentan como un unico cuerpo.[1] Nomás que ista parte, amás d'a suya torre septentrional, son d'estilo romanico, estando la cobertura d'o crucero con vuelta de crucería de finals d'o sieglo XII y las suyas naus y sagristía ya d'o sieglo XVI.[2]
En o suyo exterior, en os absides, puyan dende lo suelo contrafuertes que a meya altura se converten en columnas dica plegar en o suyo final, a on rematan con una moldura de canetes en a suya mayor parte con figuras de cabezas d'animals, encara que bel una en ye humana.[1] Chicotas finestras ubiertas en os absides permiten a iluminación de l'interior d'os mesmos,[1] tres en l'abside central y nomás que una en os laterals.[2] Istas finestras son en realidat nomás que simplas uberturas en arco de meyo punto sin garra elemento decorativo.[2] L'abside central poseye doble amplaria que los laterals, estando amás un d'os laterals meyo cubierto por a sagristía.[2]
Forman a ilesia tres naus, estando la nau central de mayors altaria y amplaria que las laterals y cubiertas todas tres con voveda de canyón una mica apunchada; os absides se troban cubiertos con vuelta de cuarto d'esfera.[1] D'atra man, cadaguna d'as naus se troba dividida en dos trampos.[2]
A cripta
L'acceso a la cripta se fa dende l'interior d'o templo, estando una mica mas chicota que la ilesia superior como consecuencia d'a mayor gordaria d'as suyas parez.[1] O suyo arco trunfal descansa sobre columnas con grans capitels con figuras d'aus.[1]
Protección legal
A ilesia d'o Salvador de Morillo de Galligo se troba protechida legalment con a suya declaración como Molimento Nacional o 14 de chunio de 1946.
Galería d'imáchens
Referencias
- ↑ 1,0 1,1 1,2 1,3 1,4 1,5 1,6 1,7 (es) Jaime Cobreros Aguirre: Las rutas del románico en España. Volumen II: Aragón, Cataluña, Navarra, País Vasco y La Rioja, Grupo Anaya, S.A., Madrit, 2004, 1era edición, ISBN 84-9776-112-X, p.192-193.
- ↑ 2,0 2,1 2,2 2,3 2,4 (es) Iglesia del Salvador. Murillo de Gállego, en a wqeb d'o Sistema de Información del Patrimonio Cultural Aragonés.
Vinclos externos
