Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
En lo Parque Nacional de Canyonlands (Utat) s'observa la erosión regresiva. La erosión que fa lo riu en la ribera que bi ha dichós de los cinglos se va propagando a traviés de barrancos dica la plana alta y la va fendo cada vegada mes chica dica fer-la desapareixer.
La erosión regresiva ye un proceso d'erosión fluvial que consiste en una erosión de la cuenca hidrografica que se va fendo dende abaixo dica d'alto en sentiu contrario a la circulación de l'augua.
La erosión regresiva encomienza en lo livel de base, y s'adreza poquet a poquet enta lo cabalto de la cuenca hidrografica afondando lo cauz y ixamplando la val con la fin de plegar dica un perfil d'equilibrio en que s'invierte toda la enerchía hidraulica en transportar la carga sedimentaria y en superar lo rozamiento. Lo perfil ideyal d'equilibrio ha de tener una pendient maxima en lo cabalto y una pendient nula en lo cabaixo u livel de base, estando concavo visto dende alto.[1]
Los cambios de livel de la mar en los periodos glacials y interglacials de lo Cuaternario han feito que lo livel de base haiga cambiau unas cuantas vegadas obligando a los rius a creyar nuevos perfils d'equilibrio. En los periodos glacials lo livel de la mar mes baixo favoreixeba la erosión regresiva y los cauces encomenzaban a afondar-se dende las boqueras. En los periodos interglacials los livels de la mar mes altos favoreixeban la sedimentación. Las actuals Bocas de Kotor (Montenegro) corresponden a foces fluvio-karsticas que se facioron cuan los cauces s'afonaban en las boqueras en periodos glacials, que dimpués quedoron baixo lo livel de la mar en l'actual periodo interglacial holocenico.
La erosión regresiva puet facilitar procesos de captura fluvial, como se puet observar actualment en la cuenca hidrografica de Xalón, que creixe a costa de las cuencas de lo Tacho[2] y lo Duero[3].
