Chadra (Zadar en croata, Zadra en dalmata, Zara en italiano) ye una ciudat croata d'a costa d'a mar Hadriana.
A suya población ye de 91.238 habitants (2008) en una superficie de 194 km².
Toponimia
En una inscripción griega de Pharos (Stari grad) en a isla de Hvar en l'anyo 384 aC os habitants d'a ciudat yeran ditos Ίαδασινοί (Iadasinoi). En o "Periplo de Pseudo-Scylax" a ciudat yera conoixita como Ίδασσα (Idassa), fácil que una forma griega vulgarizada de l'orichinal toponimo liburnio (illirio).
En l'antiguedat en latín s'escribiba Iadera a lo principio, y Iadera por os escritors mes tardanos. Os etnonimos yeran Iadestines y Iadertines. Tamién se conoix a forma Diadora de periodL'bizantín. A forma Diadora puet estar una recostrucción por hipercorrección tenendo en cuenta que en a evolución de muitas luengas neolatinas a forma Di debant de vocal da g, j. Por eixemplo en aragonés DEORSUM, DIANA y l'occitán DEUS LI VOL dioron en aragonés chuso/chos, chana y Chuslibol, con ch que se presenta en a mesma situación que a j d'as luengas neolatinas.
En a "Cronica de Morea" se'n fa mención como Jadra (ye dicir "Chadra"), y s'escribiba de trazas pareixidas en atras luengas europeas.
o que ellos deuiessen seruir el comun de
Venecia en recobrar
Jadra que se era rebellada
con otros nobles & senyores eran a Jadra & y querian pasar Ultramar
et recobrada
Jadra, el capitan de la huest & el conte de Flandres & el
duch de Venecia & los caualleros & gentiles hombres ordenaron de partir & andar en Contastinoble
En o "Libro d'el Trasoro" parlan de Gare, que s'interpreta como Chadra y d'o arçobispado de Jadrio, que s'interpreta como l'arcebispau d'Hadria:
Apres es la marca de Treujsa, que es en el
patriarchado de Agujla, en do ha .xviij. ujspados, que tocan la partida de Alamanya e de
Gare e de
Almjça sus la mar. Encara es en Ytalia el arcebispado de Genea con .iij. vispes. E despues es la isla de Santdigno e Corsiga do ha .iij. arçobispados e .xv. ujspados.
Alla do Ytallia fina a la mar de Venecia, si es la tierra d'
Estra de vltra part la mar, do yes larçobispado de
Jadrio e atros dos arçebispados e xviiij º bispados. Apres yes la tierra de
Sclauonja, en do ha .ij. arçobispados e .xiij. vispados. Apres es la tierra de
Vngria, do ha dos arçobispados e .x. bispados. Apres esto es la tierra de los
aspoliens, do ha .iiij.º arcebispados con todos .viij. bispes.
En romance venecián yera Jatara (hiperurbanismo en o sieglo IX) y Zara, en romance toscán yera Giara, y Costantín VII la mencionaba como Diadora encara en o sieglo VII en "De Administrando Imperio"),
En francés antigo yera Jadres (Geoffroy de Villehardouinin en as cronicas d'a Cuarta cruzada), en arabe Jadora (Al-Idrisí en o sieglo XII), en castellano Jazara, Jara, Sarra (sieglo XIV).
A forma moderna en serbocroata con z y que han amprau totas as luengas d'arredol se debe a una caracteristica d'a fonetica d'o desapareixiu romance Dalmata, que cambia a JA por za.
Jadera, Jadra se convertió en Zara cuan cayó baixo a sobiranía d'a Republica de Venecia en o sieglo XV, y dimpués este toponimo fue o que l'administración austriaca fació servir en o sieglo XIX, pero fue cambiau por Zadar/Zara provisionalment dende 1910 dica 1920, y en 1945 quedó como Zadar.
Historia
En o periodo que Chadra perteneixió a la Republica de Venecia os dalmatas s'asimiloron a la población veneciana u italiana mes que a la población croata. En o sieglo XIX en Chadra i heba partidarios d'o nacionalismo italiano y partidarios d'o nacionalismo croata u o illirismo. Cuan plegó l'exercito italiano d'ocupación o 4 de noviembre de 1918 os italianos prenioron o control. O Tractau de Rapallo d'o 12 de noviembre de 1920 dió Chadra y atros territorios a Italia. O enclau de Chadra, con 104 km², incluiba a ciudat de Chadra y os municipios de Bokanjac, Arbanasi, Crno, parte de Diklo y as islas de Lastovo y Palagruža y fue organizau como una provincia italiana.
Italia perdió Chadra en a Segunda Guerra Mundial, y en a postguerra ya perdió o suyo caracter italiano. En a guerra d'independencia croata l'exercito federal bombardeyó a ciudat.
Vinclos externos
