PROFILPELAJAR.COM

	Ralph Fiennes
	Fiennes in 2011 by die Berlynse Rolprentfees.
Geboortenaam	Ralph Nathaniel Twisleton-Wykeham-Fiennes
Geboorte	22 Desember 1962 (62 jaar oud)
Aktiewe jare	1985-tans

Ralph Fiennes (gebore as Ralph Nathaniel Twisleton-Wykeham-Fiennes;^[1] 22 Desember 1962) is ’n Britse akteur. Hy is veral bekend vir sy Shakespeare-rolle.

Loopbaan

Fiennes het tussen 1983 en 1985 aan die Royal Academy of Dramatic Art studeer. Hy het sy akteursloopbaan op die verhoog begin en daarna bekendheid verwerf by die Royal Shakespeare Company.^[2] Sy eerste rolprentrol was in 1992 as Heathcliff in Emily Brontë's Wuthering Heights, saam met Juliette Binoche.

In 1993 was sy eerste groot rol in die omstrede The Baby of Mâcon, wat nie goed ontvang is nie. Later in dié jaar het hy internasionaal beroemd geraak vir sy uitbeelding van ’n kommandant in ’n Nazi-konsentrasiekamp in Schindler's List. Hy is vir sy spel vir ’n Oscar en Golden Globe vir beste manlike byspeler benoem^[2] en het ’n Bafta gewen.^[3] Sy spel in The English Patient (1996) het hom ’n tweede benoeming vir ’n Oscar besorg, dié keer vir beste akteur, sowel as vir ’n Golden Globe en Bafta.

Sedertdien was Fiennes in verskeie noemenswaardige prente, soos Strange Days (1995), The End of the Affair (1999), Red Dragon (2002), The Constant Gardener (2005), In Bruges (2008), The Reader (2008), Clash of the Titans (2010), Great Expectations (2012) en The Grand Budapest Hotel (2014). Hy is ook bekend vir sy rolle in groot franchises, soos die Harry Potter-reeks, waarin hy Lord Voldemort speel, en die James Bond-reeks waarin hy van 2012 af die rol van M vertolk.

Hy het sy debuut as regisseur in 2011 gemaak met Coriolanus, ’n verwerking van die Shakespeare-tragedie, waarin hy ook die titelrol vertolk. Fiennes het ’n Tony gewen vir sy spel as Hamlet op Broadway.

Verwysings

↑ "It's Raiph actually". The Guardian. Besoek op 10 April 2008
↑ ^2,0 ^2,1 James Lipton se onderhoud met Ralph Fiennes op Inside the Actors Studio
↑ Cagle, Jess (4 Maart 1994). "It's Pronounced 'Rafe Fines'" (in Engels). Ew.com. Geargiveer vanaf die oorspronklike op 23 Junie 2013. Besoek op 7 November 2012.