Die Dinariese Alpe (Albanees: Alpet Dinaride of Alpet Dinarike, [alpɛt dinaɾikɛ]; Serwo-Kroaties: Dinaridi/Динариди, [dìnarskòː gòːrjeː]; Sloweens: Dinarsko gorstvo, [dìnarskòː gòːrstvòː]; Italiaans: Alpi Dinariche, [alpi dinarikɛ]) is 'n bergreeks in Suidoos-Europa langs die Adriatiese Seekus van die Balkanskiereiland. Dit streek oor sowat 645 km vanaf die Alpe in die noordweste tot die Albanese Alpe in die suidooste. Maja e Jezercës is met 2 694 meter bo seevlak die hoogste bergpiek van die Dinariese Alpe en is in die Albanese Alpe geleë. Die Dinariese Alpe is na Dinara genoem, 'n berg op die grens tussen Kroasië en Bosnië en Herzegowina met 1 831 meter bo seevlak.

Die Dinariese Alpe behoort tot 'n reeks gebergtes wat langs die noordkus van die Middellandse See streek. Dit behoort tot die Alpynse berggordel van Eurasië. Die Dinariese Alpe beslaan dele van die lande Italië, Slowenië, Kroasië, Bosnië en Herzegowina, Serwië, Montenegro, Kosovo en Albanië. Dit word deur die Juliaanse Alpe in die noordweste, die Savarivier in die noorde, die Moravarivier in die ooste, die Drinrivier in die suidooste en die Adriatiese See in die suidweste begrens. Verder noord sluit die Pannoniese Laagvlakte en toe die Groot Hongaarse Laagvlakte aan.

• Wikimedia Commons het meer media in die kategorie Dinariese Alpe.
• (en) "Dinaric Alps". Encyclopædia Britannica. Besoek op 27 April 2019.